Almatynyń egjeı-tegjeıli josparlaý jobasyna ózgerister engizýge moratorıı jarııalandy

ALMATY. KAZINFORM – Almatynyń egjeı-tegjeıli josparlaý jobasyna (ETJ) ózgerister engizýge jyl sońyna deıin moratorıı jarııalandy. Bul týraly Almaty ákimi Erbolat Dosaev Naýryzbaı aýdanynyń turǵyndarymen kezdesý barysynda málimdedi.

«Bizdiń aýdannyń qurylǵanyna 10 jyl boldy, osy ýaqyt ishinde aýdan damyp, qurylystar kóbeıdi. Jaqynda ákimdik naqtylanǵan qurylysty shekteıtin egjeı-tegjeıli josparlaýdyń jańa jobalaryn qabyldady. Biraq zań boıynsha olarǵa jylyna eki ret ózgerister engizýge bolady. ETJ-ǵa engizilgen barlyq oń bastama osyǵan baılanysty ózgerip ketpeı me?»,- dep surady almatylyq turǵyn.

Erbolat Dosaev byltyr úkimet Almatynyń 2040 jylǵa deıingi Bas josparyn qabyldaǵanyn eske saldy.

«Al jeltoqsan aıynyń sońynda osy sheshimdi júzege asyrý úshin biz barlyq polıortalyqtardyń egjeı-tegjeıli ornalasý josparyna túzetýler qabyldadyq. Almaty qalasynyń bolashaqtaǵy damýy - shaǵyn qabatty úılerdiń qurylysy. Men jyl sońyna deıin túzetý engizýge moratorıı jarııaladym. Eger ózgeris qajet bolsa, kelesi jyly qarastyramyz. Meniń oıymsha, ázirleýshiler de, turǵyndar da meni túsinedi, óıtkeni biz jospardyń turaqtylyǵyn qamtamasyz etýimiz kerek»,- dep jaýap berdi Almaty ákimi.

Aıtýynsha, Naýryzbaı aýdanynda qoǵamdyq keńistikti barynsha jaqsartýǵa kúsh salynady.

Buǵan deıin Almaty ákimdigi sarapshylarmen jáne qoǵam ókilderimen keńinen talqylaýdan keıin egjeı-tegjeıli josparlaý jobalaryn (ETJ) bekitkeni týraly jazǵan bolatynbyz.