Almatynyń dızaın-kody bekitiledi
Almaty máslıhatynyń kezekti sessııasy barysynda depýtattar qalanyń dızaın-kodyn bekitti, dep habarlaıdy Kazinform.
Almaty ákiminiń orynbasary Asqar Ámrınniń aıtýynsha, shahardyń dızaın-kody - bul ómir súrýge qolaıly úılesimdi megapolıs qurý úshin qalalyq ortany qalyptastyrý jónindegi erejeler men qaǵıdattardyń jıyntyǵy.
«Bizdiń aldymyzda eki mindet tur – Almatynyń tanymal tarıhı kelbetin saqtaý jáne álemdik tendentsııalardy eskere otyryp, megapolıstiń bolashaq beınesin damytý», – dedi Almaty ákiminiń orynbasary Asqar Ámrın.
Sonymen qatar ol bul qujat osy maqsattarǵa qol jetkizýge yqpal etýge arnalǵanyn atap ótti.
Dızaın-kod kezeń-kezeńimen engiziletin bolady. Jańa nysandar úshin usynystar men talaptardyń tolyq kólemi qoldanylady.
«Dızaın-kodtyń bólek servıs-saıty ázirlendi. Bul aqparat, resýrstar jınaýǵa jáne bilim almasýǵa arnalǵan ortalyq alań. Sonymen qatar, atalǵan saıt dızaın-kodty engizý barysynda dıalog alańy retinde qoldanylatyn bolady. Dızaın-kodty ázirleý kezinde barlyq normatıvtik-quqyqtyq talaptar oryndaldy»,- deıdi ol.
Osyǵan deıin Almatynyń dızaın-kod jobasy ázirlengenin jazǵan bolatynbyz.
