Almatynyń densaýlyq saqtaý salasyna 344 mlrd teńge bólindi

ALMATY. KAZINFORM – Bıyl Almaty qalasynyń densaýlyq saqtaý salasynyń bıýdjeti 334,7 mlrd teńge. Onyń 165,1 mlrd teńgesi MÁMS paketine tıesili. Bul týraly óńirlik kommýnıkatsııalar qyzmetinde ótken baspasóz máslıhaty barysynda medıtsınalyq saqtandyrý qorynyń Almaty qalalyq fılıaly dırektory Іlııas Muhamedjan aıtty.

Aıtýynsha, MÁMS sheńberinde qarjylandyrý deńgeıi ótken jylmen salystyrǵanda 7 pıayzǵa ósken. 

– Bıyl Almaty qalasy boıynsha 230 medıtsına mekemesi Qormen kelisimshart bekitti, onyń 138-i – jekemenshik. Qormen jumys isteýge nıet bildirgen jańa klınıkalar sany – 12. Olar negizinen emhanalar men stomatologııalyq klınıkalar. Kepildendirilgen tegin kómek jáne MÁMS paketteri boıynsha tapsyrys alǵan emhanalar men statsıonarlar tizimin qordyń msqory.kz resmı saıtynan tabýǵa bolady, – dep atap ótti Іlııas Muhamedjan. 

2025 jyly qarjynyń basym bóligin ıaǵnı, 46 mlrd teńgesin ambýlatorııa deńgeıinde kórsetiletin medıtsınalyq kómekke, sonyń ishinde, emhana qyzmetine, 36,9 mlrd teńgesin konsýltatıvtik-dıagnostıkalyq qyzmetterge jumsaý josparlanǵan. Bul baǵytty qarjylandyrý kólemi ótken jylmen salystyrǵanda 23% artyp otyr. 

– Osy jyly júkti áıelderdi antenataldy baqylaýǵa qosa, MÁMS sheńberinde bala súıýge daıyndalyp júrgen (pregravıdarlyq daıarlyq) erli-zaıyptylarǵa konsýltatıvtik-dıagnostıkalyq kómek qarastyrylǵan. Buǵan 651 mln teńge bólindi. Bul deni saý urpaq ákelýge josparly daıyndyq deńgeıin kóterýge kómektesedi, – dedi spıker.

Pregravıdarlyq daıarlyq (aldyn-ala daıarlyq) – erli-zaıyptylardyń dúnıege bala ákelýge daıyndyǵy men densaýlyq jaǵdaıyn dıagnostıkalaýǵa arnalǵan profılaktıkalyq jáne emdik sharalar kesheni. 

Ol «Analar saýlyǵy» memlekettik baǵdarlamasy sheńberinde júrgizilmek.

Eske salaıyq, Prezıdent 2021 jyly bastamashylyq etken «Ańsaǵan sábı» baǵdarlamasy nátıjesinde elde tórt jylda 10000-nan astam sábı dúnıege keldi.

Buǵan deıin «Ańsaǵan sábı» baǵdarlamasy 2030 jylǵa deıin jalǵasatyny týraly jazǵan bolatynbyz.