Almatynyń demalys aımaǵy táýligine 40 myń týrıske deıin qabyldaıtyn bolady

ASTANA. KAZINFORM – Aqorda Prezıdent Qasym-Jomart Toqaevtyń Almaty qalasy ákimin qabyldaǵanyn habarlady.

Memleket basshysyna qalanyń áleýmettik-ekonomıkalyq damýy, sondaı-aq negizgi qala qurylysy men ınfraqurylym jobalarynyń júzege asyrylýy týraly baıandaldy.

Darhan Satybaldy byltyr qysqa merzimdi ekonomıkalyq ındıkator 12,8 paıyzǵa kóterilgenin aıtty.

Memleket bıýdjetine 6,6 trıllıon teńge salyq pen mindetti tólemder túsken.

Sonymen birge qalanyń birneshe ortalyǵyn damytýǵa baǵyttalǵan jańa strategııalyq bastamalardy tanystyrdy. Atalǵan tujyrymdama aıasynda zamanaýı IT-ınfraqurylym, kópfýnktsıonaldy iskerlik keshender, sondaı-aq turǵyndardyń demalysy úshin abattandyrylǵan rekreatsııalyq aımaqtar jasaqtalady. ıAǵnı bul jurtshylyq jıi baratyn oryndarǵa aınalady.

Almaty qalasynyń zamanaýı kólik júıesin qalyptastyrý jóninde málimet berdi.

Júrdek qoǵamdyq kólik júıelerin damytý turǵyndardyń júrip-turýyna qolaıly jaǵdaı jasap, qalany ornyqty damytýdyń negizgi faktory bolmaq.

Almatynyń Bas josparynda aýanyń erkin aınalymyn qamtamasyz etýdi, shahardyń joǵary jáne ortalyq bólikterindegi shamadan tys tyǵyz qurylysty tejeýdi, sondaı-aq jasyl jelektiń aýmaǵyn úsh esege – 3 800 gektarǵa deıin ulǵaıtýdy kózdeıtin sheshimder qarastyrylǵanyn jetkizdi.

2025 jyly qala kósheleri sapaly jaryqtandyrylyp, qýaty eki ese artqany jóninde baıandady.

Budan bólek, qalany abattandyrý, kógaldandyrý, qoǵamdyq keńistikterdi bezendirýdiń biryńǵaı standartyna sáıkes saıabaqtar men kóshelerdi jańǵyrtý sharalary josparlanǵan.

Almaty taý klasteri jobasyn daıyndaý jaıynda esep berdi. Qazirgi kezde «Medeý» bazalyq stantsııasy arqyly «Shymbulaq» jáne «Oı-Qaraǵaı» kýrorttaryn biriktirýdi kózdeıtin tehnıkalyq-ekonomıkalyq negizdemeni ázirleý jumystary aıaqtalyp qaldy.

Atalǵan jobany júzege asyrý nátıjesinde aspaly joldardyń sany 16-dan 62-ge deıin kóbeıedi, taý shańǵysy trassalary 250 shaqyrymnan asa uzarady, al demalys aımaqtary táýligine 40 myń adamǵa deıin qabyldaı alatyn deńgeıge jetedi.

Memleket basshysy Almaty qalasynyń ekonomıkasyn odan ári ártaraptandyrý, ekologııalyq jaǵdaıyn jaqsartý, qalanyń ornyqty kólik jáne týrıstik ınfraqurylymyn qalyptastyrý, sondaı-aq qala ortasynyń sapasy men turǵyndardyń turmys deńgeıin arttyrý jóninde birqatar tapsyrma berdi.

Aıta keteıik, búgin Memleket basshysy Joǵarǵy Sot tóraǵasy Aslambek Merǵalıevti qabyldady.