Almatynyń bıýdjeti 3,6 mlrd teńgege qysqardy

ALMATY. KAZINFORM – Almatyda qalalyq máslıhattyń kezekten tys XXXV sessııasy ótti.

Ekonomıka jáne qarjy basqarmasynyń basshysy mindetin atqarýshy Baýyrjan Qudaıbergenov naqtylanǵan qala bıýdjeti 3,6 mlrd teńgege azaıtylyp, 2025 jyl úshin bıýdjet 2 trln 508,4 mlrd teńge bolatynyn aıtty.

- Qarjylandyrý kólemin qysqartý týraly sheshim nysandardy iske asyrýdyń sapaly aıaqtalýyn qamtamasyz etý qajettiliginen týyndaǵan. Eń aldymen, merdiger uıymdarǵa júrgiziletin tekserýler barysynda anyqtalǵan barlyq eskertýlerdi nysandardy tolyq paıdalanýǵa bermeı turyp joıýǵa múmkindik beredi. Sondaı-aq jańa bastamalardy iske asyrýǵa 16,4 mlrd teńge bólý josparlanyp otyr, - dedi ol.

Vedomstvo basshysynyń aıtýynsha, áleýmettik salaǵa qosymsha 66,1 mlrd teńge baǵyttaldy. Bilim berý salasyna 41,2 mlrd teńge qarastyryldy. Onyń ishinde: 6 mekteptiń qurylysyn bastaý jáne jańǵyrtý jumystary, 8 mektepti seısmıkalyq kúsheıtý, 2 balabaqshada jóndeý jumystaryn jalǵastyrý josparlanǵan.

Al densaýlyq saqtaý salasyna 6,9 mlrd teńge baǵyttalmaq. Bul qarajat №1 perzenthananyń jańa ǵımaratyn salýǵa, №7 klınıkalyq aýrýhanany jańǵyrtýǵa, PAKS vızýalızatsııa júıesin engizý jáne t.b. jumystarǵa jumsalady.

- Sport salasyn damytýǵa 9,6 mlrd teńge bólinedi. Onyń ishinde 35 myń orynǵa zamanaýı fýtbol stadıonynyń qurylysy qarastyrylǵan. Qurylystyń bastapqy kezeńinde jergilikti bıýdjetten 6 mlrd teńge qarjylandyrý qajet bolady. Sondaı-aq «Medeý» keshenin jańǵyrtý jumystary bastaldy. Jobanyń quny - 28,5 mlrd teńge. Bıyl jumystardy bastaý úshin 3 mlrd teńge qarastyryldy, - dedi ol.

Eske salaıyq, buǵan deıin Almatyda 35 myń oryndyq jańa stadıon qaıda salynatyny belgili boldy.