Almatynyń burynǵy bas arhıtektorynyń isi sotqa tústi

ALMATY. KAZINFORM – Almaty qalalyq Josparlaý jáne ýrbanıstıka basqarmasynyń burynǵy basshysy Almashan Ahmetjanovtyń isi sotqa tústi.

Aqparatty Almaty qalalyq sotynyń baspasóz qyzmeti rastady. Іs qalalyq qylmystyq ister jónindegi mamandandyrylǵan aýdanaralyq sotynda qaralady.

Іske barlyǵy bes adam qatysty. Olardyń arasynda Almashan Ahmedjanovtan bólek megapolıs jer qatynastary basqarmasynyń burynǵy basshysy Ardaq Samambetov te bar.

Sot otyrysy áli belgilengen joq.

Eske salaıyq, 2023jyldyń 19 shildesinde Sybaılas jemqorlyqqa qarsy is-qımyl qyzmeti zańsyz qurylysqa ruqsat berip kelgen ýrbanıstıka basqarmasynyń basshysy ustalǵany týraly aqparat taratqan edi.

Ol jer ýchaskelerin berý jáne obektilerdiń qurylysyn kelisý kezinde laýazymdyq ókilettikterin asyra paıdalandy degen kúdikke ilindi. Máselen, jeke turǵyn úı qurylysyna arnalǵan jer ýchaskelerinde, nysanaly maqsatyna qaramastan jáne qurylystyń tyǵyzdyǵyn eskermeı, jekelegen qurylys kompanııalarynyń múddesi úshin 2020-2023 jyldary 3 kóppáterli turǵyn úı kesheniniń qurylysyn zańsyz kelisken. Memleketke 307 mln teńgeden astam somaǵa jer ýchaskeleriniń tólenbegen kadastrlyq quny túrinde zalal keldi.

Keıin mamandandyrylǵan aýdanaralyq tergeý soty Almashan Ahmedjanovty qamaýǵa aldy.