Almatynyń burynǵy bas arhıtektory sotta sońǵy sózin aıtty

ALMATY. KAZINFORM - Almaty qalalyq Josparlaý jáne ýrbanıstıka basqarmasynyń burynǵy basshysy Almashan Ahmetjanov pen basqa da tulǵalarǵa qatysty sot talqylaýy aıaqtaldy.

Іs qalalyq qylmystyq ister jónindegi mamandandyrylǵan aýdanaralyq sotynda sýdıa Mártpek Kákimjanovtyń tóraǵalyǵymen qaralyp jatyr.

Onda aıyptalýshy Almashan Ahmetjanovtan bólek, taǵy alty adam otyr, olardyń arasynda Almaty qalalyq jer qatynastary basqarmasynyń burynǵy basshysy Ardaq Samambetov te bar.

Búgin sot talqylaýy barysynda aıyptalýshylar sońǵy sózderin aıtty.

Almashan Ahmetjanov ózine taǵylǵan aıyppen kelispeıtinin jáne óz isin qorǵaıtynyn málimdedi.

– Bul meniń sońǵy sózim bolǵandyqtan, qatysqandary úshin bárine alǵys aıtqym keledi. Biraq aıyptaý aktisi oqylǵan kezde men «quqyq pen tártip» degen sózdi Sybaılas jemqorlyqqa qarsy qyzmet pen prokýratýra basqasha qabyldaǵanyn túsindim. ıAǵnı, prokýratýra men antıkor «ólim jazasyna» qol qoıdy, – dedi Ahmetjanov.

Sonymen qatar, ol ómir boıy sáýlet jáne qala qurylysy salasyndaǵy quqyqtyq normalardy jetildirýge, ruqsat berý rásimderin jeńildetýge jáne bıýrokratııalyq normalardy azaıtýǵa baryn salyǵanyn jetkizdi.

Ardaq Samambetov te ózin kinásiz sanaıdy. Ol ózine qatysty suralǵan jazanyń (qaýipsizdigi ortasha mekemede 12 jyl bas bostandyǵynan aıyrý) tym qatal jáne kisi óltirýshiler úshin taǵaıyndalatyn jazamen salystyrýǵa bolatynyn atap ótti.

– Eńbek jolymda 8 basshy, 4 ákim, 4 mınıstr aýysty. Meni basqa da qyzmetterge, sonyń ishinde ortalyq ýákiletti organdarǵa shaqyrdy. Meniń minsiz bedelim bar edi, ony osy zańsyz qylmystyq ispen joıyp jiberdi, – dedi Samambetov.

Erlan Jarmuhanbetovke qarjy jymqyrdy, alaıaqtyq jasady, qyzmettik ókilettigin asyra paıdalandy jáne para aldy degen aıyp taǵylyp otyr.

Almazhan Bákirov qylmystyq quqyq buzýshylyqqa ıtermeleý jáne kómektesý, alaıaqtyq jáne para alý boıynsha aıyptaldy.

Muhanbetáli Shalqarbekov pen Berik Óskembaevqa alaıaqtyq jasady degen aıyp taǵyldy.

Aıta keteıik, byltyr 4 qyrkúıek kúni Almatyda qala qurylysy basqarmasynyń burynǵy basshysyna qatysty basty sot otyrysy bastalǵan bolatyn.

Eske salaıyq, 2023 jyly shilde aıynda Sybaılas jemqorlyqqa qarsy qyzmet Almaty qala qurylysy basqarmasynyń burynǵy basshysyn ustaǵany belgili boldy.

Vedomstvonyń málimetinshe, sheneýnik jer telimderin berý jáne nysandardyń qurylysyna ruqsat berý kezinde qyzmettik ókiletterin asyra paıdalandy degen kúdikke ilingen.

Máselen, ol jeke turǵyn úı qurylysyna arnalǵan jer ýchaskelerinde, nysanaly maqsatyna qaramastan jáne qurylystyń tyǵyzdyǵyn eskermeı, jekelegen qurylys kompanııalarynyń múddesi úshin 2020-2023 jyldary 3 kóppáterli turǵyn úı kesheniniń qurylysyn zańsyz kelisken.

Nátıjesinde memleketke 307 mln teńgeden astam somaǵa jer ýchaskeleriniń tólenbegen kadastrlyq quny túrinde zalal keldi.

Budan basqa, 2020 jyly medıtsınalyq ortalyq pen HQO-nyń qurylysyn zańsyz kelise otyryp (ınvestıtsııalyq jobalardy iske asyrý túrimen), múddeli tulǵalardyń jeke menshigine jer ýchaskelerin tómen quny boıynsha odan ári negizsiz berýge yqpal etti. Shyǵyn 180 mln teńge.