Almatynyń búkil qyzmetteri kúsheıtilgen jumys rejımine kóshti
ASTANA. KAZINFORM – Almaty qalasynyń barlyq qyzmeti kúsheıtilgen jumys rejımine aýystyryldy. Bul týraly búgin Úkimet otyrysynda Almaty qalasynyń ákimi Erbolat Dosaev aıtty.
«2024 jylǵy 4 naýryzda saǵat 11-den 22 mınýt ketkende Almaty qalasynda jer silkinisi tirkeldi. 2024 jylǵy 4 naýryzda saǵat 11.30-da meniń basshylyǵymmen Almaty qalasynyń tótenshe jaǵdaılardy joıý jónindegi jedel shtaby jumysyn bastady. Barlyq ınfraqurylym jáne tirshilikti qamtamasyz etý obektileri shtattyq rejımde jumys istedi jáne jumysyn jalǵastyrýda. Jedel shtabtyń sheshimi boıynsha saǵat 11.40-ta qalada bekitilgen 384 qabyldaý pýnkti ornalastyryldy. Saǵat 15.00-ge deıin qabyldaý pýnktterine 1 962 adam, onyń ishinde 714 bala keldi. Saǵat 16.00-den bastap, Jedel shtab habarlamalarynan keıin turǵyndar úılerine orala bastady. Saǵat 23.00-daǵy jaǵdaı boıynsha qabyldaý pýnktterinde 242 turǵyn, onyń ishinde 93 bala túnep qaldy. 5-shi naýryz kúni tańerteń barlyq turǵyn qabyldaý pýnktterinen shyǵyp ketti. Mektepter, balabaqshalar men joǵary oqý oryndary shtattyq rejımde jumys isteıdi», — dedi qala basshysy.
Onyń aıtýynsha, azamattardy jınaý pýnktteriniń jumysyn qamtamasyz etýge aýdan ákimdikteri men qutqarý qyzmeti jumyldyryldy. Kelgen qala turǵyndary uıyqtaıtyn kerek-jaraqtarmen, sýsynmen jáne tamaqpen qamtamasyz etildi. Barlyq qabyldaý pýnktterinde polıtsııa jáne tótenshe jaǵdaı qyzmetkerleriniń kezekshiligi uıymdastyryldy.
«Sondaı-aq 4 naýryz saǵat 11.24-te metropolıten stantsııalarynda barlyq elektr jyljymaly quramdar toqtatyldy. Mamandar tonnelderdi tekserý boıynsha jumystar júrgizdi. Onyń barysynda metro aýmaǵynda zaqym tirkelmedi. Saǵat 16.30-da Almaty metropolıteni óz jumysyn shtattyq rejımde qaıta bastady. 2024 jylǵy 4 naýryzda saǵat 12.30-daǵy jaǵdaı boıynsha 1 zardap shekken adam qalalyq statsıonarǵa jetkizildi. Aýrýhanada oǵan barlyq qajetti medıtsınalyq jáne psıhologııalyq kómek kórsetildi», — dedi Erbolat Dosaev.
Almaty ákiminiń aıtýynsha, buǵan deıin tótenshe jaǵdaılar departamenti, Qazaq qurylys jáne sáýlet ǵylymı-zertteý ınstıtýty, qala qurylysyn baqylaý basqarmasynyń mamandary, aýdandyq sáýletshiler jáne basqa da ýákiletti organdar quramynda buryn qurylǵan arnaıy komıssııa saǵat 13.00-den bastap, barlyq qoǵamdyq ǵımarattardy, sondaı-aq turǵyndardyń ótinishteri boıynsha basqa da obektilerdi tekserýdi bastady.
Komıssııa jumysynyń nátıjesi boıynsha tıisti sharalar qabyldanady.
«5 naýryz kúni tańerteń Almaty qalasyndaǵy jaǵdaı turaqty, jedel shtab jumys isteıdi, barlyq qyzmeti jumyldyrylyp, kúsheıtilgen jumys rejımine aýystyryldy», — dedi ol.
