Almatynyń birneshe aýdanynda jol opyrylyp, kólikter shuńqyrǵa tústi
ALMATY. KAZINFORM — Almatylyqtar áleýmettik jelide jaýyn-shashyn saldarynan buzylǵan joldardyń beınejazbalaryn jarııalap jatyr.
Turǵyndardyń biri beınerolıkte Butaqty shatqalyna baratyn joldyń bir bóligi shógip, onda júk kóligi batyp qalǵanyn kórsetedi. Avtordyń aıtýynsha, osy jaǵdaıdyń sebebinen kólik qozǵalysy toqtap, mundap keptelis qalyptasqan.
Atalǵan jaǵdaıǵa «Almaty sý» túsinikteme berdi. Mekeme jaýabyna sáıkes, munda apattyq jaǵdaıdaǵy sýmen jabdyqtaý jelilerin aýystyrý jumystary júrgizilip jatyr.
— Bul jumystar Muztaý shaǵynaýdanyn ortalyqtandyrylǵan sýmen qamtamasyz etedi. Aýystyrylatyn jelilerdiń jalpy uzyndyǵy — 2,5 km. Jol tósemin qalpyna keltirýdi 15 qazanǵa deıin aıaqtaý josparlanyp otyr, — delingen mekeme jaýabynda.
Sonymen qatar «Almaty sý» oıylǵan, shuńqyr bolǵan ýchaskelerge ınertti materıaldarmen qaıta topyraq sebý jumystary júrgizilgenin atap ótti.
Osyǵan uqsas jaǵdaı Almatynyń basqa bóliginde boldy. Jeli qoldanýshy jarııalaǵan beınejazbadan jeńil kóliktiń astynda asfalttyń opyrylyp ketkenin kórýge bolady. Beınerolık avtorynyń aıtýynsha, 1-shi shaǵynaýdanyndaǵy bul jolda asfalt jaqynda ǵana tóselgen.
Máselege qatysty taǵy da «Almaty sý» mekemesi jaýap qatty. Resmı málimetke sáıkes, munda «Almaty Sý» tapsyrysy boıynsha merdiger — «ACM Construction» JShS ınjenerlik jelilerdi rekonstrýktsııalaý jumystaryn júrgizip jatyr.
— Bul jeliler 60–70 jyldary paıdalanýǵa berilgen jáne tozý deńgeıi óte joǵary. Rekonstrýktsııalaý jumystary sýmen senimdi ári úzdiksiz qamtamasyz etý, tozǵan jelilerdi aýystyrý jáne aýyzsý sapasyn arttyrý úshin júrgizilip jatyr. Jobany aıaqtaý merzimi — 30 qazan, munyń ishine jol tósemin qalpyna keltirý de kiredi, — dep habarlady mekemeden.
Sondaı-aq «Almaty sý» ókilderi ótinishte kórsetilgen eskertýler baqylaýǵa alynǵanyn jáne dereý joıylatynyn málimdedi.
Polına esimdi taǵy bir turǵyn Almagúl shaǵynaýdanyndaǵy jaǵdaıdy áleýmettik jelide bólisti. Onda joldyń birneshe jerden opyrylyp, shuńqyr paıda bolǵanyn kórýge bolady. Turǵyn munda asfalt tóselgenine 2 aptadan aspaǵanyn jazǵan.
Bul beınejazbaǵa túsinikteme bergen «Almaty jylý jelileri» JShS atalǵan ýchaskede buǵan deıin jylý jelilerin qazýǵa baılanysty apattyq jumystar júrgizilip, olar aıaqtalǵan soń asfalt tósemi qalpyna keltirilgenin habarlady. Kompanııa jaýabyna sáıkes, jaýyn-shashynǵa baılanysty qalpyna keltirilgen ýchaskede asfalt tósemi shógip ketken.
— Qazirgi ýaqytta ýchaskeni qalpyna keltirý boıynsha qajetti jumystar júrgizilip jatyr. Asfalt tósemin qalpyna keltirý jumystaryn 12 qazanǵa deıin aıaqtaý josparlanyp otyr, — dep naqtylady «Almaty jylý jelileri» JShS.
Eske salaıyq, buǵan deıin Almatyda LRT qurylysy júrip jatqan Momyshuly jáne Tóle bı kóshelerinde jol oıyldy.
