Almatynyń birneshe aýdanynda demalys kúnderi jármeńke ótedi
ALMATY. KAZINFORM — Almatylyqtar jyl basynan beri demalys kúnderi ótetin jármeńkelerden 10 myń tonnadan astam aýyl sharýashylyǵy ónimderin satyp alǵan.
Almaty ákimdiginiń málimetinshe, qańtar-mamyr aılarynda shaharda 40-tan astam jármeńke ótip, oǵan 450 myńǵa adam jýyq qatysty. Jármeńkelerge Almaty qalasy men Almaty oblysynan 300-den astam aýyl sharýashylyǵy taýaryn óndirýshiler men fermerler qatysyp júr.
Almatylyqtar jármeńkede alatyn negizgi azyq-túlik túrleri: kókónis pen jemis, et, sút ónimderi, jumyrtqa, shujyq, bal, nan ónimderi jáne táttiler — barlyǵy 1000-nan astam taýar túrleri jatady.
Jármeńkeler ár senbi jáne jeksenbi kúnderi saǵat 09:00–den 18:00–ge deıin kelesi mekenjaılarda ótedi:
• Almaly aýdany — Masanshy kóshesi (Áıteke bı kóshesi men Gogol kóshesiniń arasy);
• Áýezov aýdany — Ótegen batyr kóshesi (Abaı dańǵylynan tómen);
• Bostandyq aýdany — «Qazaqfılm» shaǵyn aýdany (ál-Farabı dańǵylynyń ústinde);
• Medeý aýdany — Meńdiqulova býlvary — Bekturova kóshesi;
• Alataý aýdany — «Mádenıet» turǵyn úı kesheni.
Eske salaıyq, 1 maýsymda Almatyda jol jóndeý jumysy bastalady.