Almatynyń bir kóshesinde qozǵalys jazǵa deıin shekteledi
ALMATY. KAZINFORM – Almatynyń energetıka jáne sýmen jabdyqtaý basqarmasy Stroıtelnaıa kóshesiniń bir bóliginde qurylys-montaj jumystarynyń júrgizilýine baılanysty kólik qozǵalysyna ýaqytsha shekteý engiziletinin habarlady.
Basqarmanyń málimetinshe, bul jumystar «Almaty qalasynda Batys káriz kollektoryn salý» ınfraqurylymdyq jobasy aıasynda júzege asyrylyp jatyr. Merdiger uıym – «Pavlodar ózen porty» AQ.
Qurylys-montaj jumystary 2026 jyly 30 naýryz ben 10 maýsym aralyǵynda Stroıtelnaıa kóshesinde, sondaı-aq Naýryzbaı aýdanyndaǵy Abaı dańǵyly men Stroıtelnaıa kóshesiniń (dýbler) qıylysynda júrgiziledi.
– Osyǵan baılanysty atalǵan ýchaskelerde avtokólik qozǵalysyna ýaqytsha shekteýler kezeń-kezeńimen engiziledi. Kósheni tolyq jabý qarastyrylmaǵan. Bul kólik qozǵalysyndaǵy qolaısyzdyqty barynsha azaıtyp, kólik qozǵalysynyń qoljetimdiligin saqtaýǵa múmkindik beredi, - dep habarlady Almatynyń Energetıka jáne sýmen jabdyqtaý basqarmasy.
Vedomstvonyń málimetinshe, bul shekteýler iri ınfraqurylymdyq jobany iske asyrýǵa baılanysty engizilip otyr.
– Uzyndyǵy 34,9 shaqyrym bolatyn Batys káriz kollektory Naýryzbaı jáne Alataý aýdandaryndaǵy 175 myńnan astam turǵyndy, sondaı-aq Almaty oblysynyń Qarasaı jáne Іle aýdandaryndaǵy shamamen 20 myń adamdy ortalyqtandyrylǵan sý burý júıesimen qamtamasyz etedi, - delingen habarlamada.
Basqarma ókilderi qala turǵyndary men qonaqtarynan ýaqytsha qolaısyzdyqqa túsinistikpen qarap, baǵyttaryn aldyn ala josparlaý kezinde engizilgen ózgeristerdi eskerýdi suraıdy.
Eske salaıyq, buǵan deıin Almatynyń eki kóshesinde kólik qozǵalysy ýaqytsha shektelgenin jazǵan edik.