Almatynyń bir bóligi jaryqsyz qalyp, «Kóktóbe» aspaly joly ýaqytsha toqtady

«Kóktóbe» saıabaǵynyń ákimshiligi aspaly joldyń toqtaǵanyn rastady.

— Qazirgi ýaqytta elektr energııasynyń bolmaýyna baılanysty aspaly joldyń jumysy ýaqytsha toqtatyldy. Elektr qýatynyń qashan qalpyna keltiriletinin naqty aıta almaımyz. Jaryq berilgen boıda jumys qalypty rejımde qaıta jalǵasady. Barlyq jolaýshy rezervtik avarııalyq generatordyń kómegimen jerge qaýipsiz túsirildi, — dep habarlady saıabaq ákimshiligi.

Sonymen qatar «Kóktóbe» saıabaǵynyń ákimshiligi qazirgi ýaqytta aspaly joldaǵy apattyń sebepteri tolyq anyqtalyp, barlyq júıe tekserilgenge deıin jabyq bolady. Zardap shekkender joq ekenin atap ótti. 

Oǵan qosa, «Alataý Jaryq Kompanııasy» AQ óz kezeginde týrıstik nysandy elektrmen qamtamasyz etetin jeliler ózderiniń teńgeriminde emestigin málimdedi.

— Bul elektr jelileri «Alataý Jaryq Kompanııasy» AQ-nyń teńgeriminde joq. Atalǵan jelilerge qyzmet kórsetetin energetıkalyq uıymǵa qajetti sharalardy qabyldaý úshin tıisti aqparat berildi, — dep málimdedi kompanııa ókilderi.

Soǵan qaramastan, aýqymdy elektr jelisindegi aqaý kompanııanyń óz jelilerine de áser etti. «Alataý Jaryq Kompanııasy» usynǵan elektr óshirý kartasyna sáıkes, qalada № 2 aýdandyq elektr jelileri jáne № 6 jelilerinde birden birneshe iri apattyq aqaý tirkelgen.

Elektr jaryǵynsyz Almatynyń ortalyq bóliginiń edáýir aýmaǵy qaldy. Atap aıtqanda, Abaı dańǵyly, Nazarbaev dańǵyly, sondaı-aq Bógenbaı batyr, Naýryzbaı batyr, Zenkov, Begalın jáne Qabanbaı batyr kósheleri jaryqsyz qalǵan.

— Saǵat 14:45–te barlyq tutynýshynyń elektrmen jabdyqtalýy tolyq qalpyna keltirildi, — dep habarlady «Alataý Jaryq Kompanııasynyń» baspasóz qyzmeti.

Buǵan deıin Aqtóbede daýyldan keıin jaryqsyz qalǵan aýylǵa birneshe aýdannan arnaıy top bardy.

Sonymen qatar Estonııada daýyldan keıin 8 myńnan astam úı jaryqsyz qalǵanyn jazǵanbyz.