Almatynyń bir aýdanynda aýadaǵy zııandy zattar normadan birneshe ese asyp ketken
ALMATY. KAZINFORM – Almatynyń Naýryzbaı aýdanynda atmosferalyq aýanyń sapasyn tekserý nátıjesinde birqatar kórsetkish boıynsha shekti mólsherden asyp ketkeni anyqtaldy. Bul týraly «Eco Almaty» JShS ókilderi habarlady.
Kásiporyn málimetinshe, azot dıoksıdiniń kontsentratsııasy 0,2 mg/m³ norma kezinde 4,410 mg/m³, benzol – 0,3 mg/m³ ornyna 5,749 mg/m³, al qalqyma bólshekter (shań) 0,5 mg/m³ normanyń ornyna 36,949 mg/m³ bolǵan.
– Aýa sapasyna qatysty tekserý Naýryzbaı aýdany turǵyndarynyń aýanyń nasharlaýy, ótkir ıister jáne ómir súrý jaǵdaıyna keri áseri týraly shaǵymynan keıin júrgizildi. Turǵyndarmen kezdesý 13 mamyr kúni «Eco Almaty» JShS, ekologııa departamenti, Naýryzbaı aýdany ákimdigi jáne sanıtarlyq-epıdemıologııalyq baqylaý departamenti ókilderiniń qatysýymen ótti, - delingen habarlamada.
Zertteý barysynda mamandar kómirtek totyǵy (CO), azot dıoksıdi (NO₂), kúkirt dıoksıdi (SO₂), kúıe, qorǵasyn, qalqyma bólshekter, formaldegıd, kúkirtsýtek, benzol jáne kómirsýtekterdiń quramyn anyqtady.
Jınalǵan materıaldar qoldanystaǵy zańnama aıasynda qaraý jáne tıisti sharalar qabyldaý úshin ýákiletti organdarǵa joldandy.
Eske salaıyq, buǵan deıin «Qazgıdromet» RMK 14 mamyrda Astana men Almatyda jáne ortalyq óńirdegi qalalarda aýa sapasy nasharlaıtynyn boljaǵan edi.
