Almatynyń bir aýdanynda apatqa baılanysty ystyq sý óshirildi
ALMATY. KAZINFORM — 2025 jylǵy 3 qazanda Almatynyń Almaly aýdanyndaǵy Shákárim kóshesinde taratý jylý jelisindegi qubyr zaqymdandy.
«Almaty jylý júıesi» JShS málimetinshe, apat 2010 jyly paıdalanýǵa berilgen qubyrdyń korrozııaǵa ushyraýy saldarynan bolǵan.
— Zaqymdanǵan dıametri 200 mm qubyr ýchaskesin qalpyna keltirý úshin «Almaty jylý jelileri» brıgadasy jóndeý jumystaryn júrgizip jatyr. Oǵan 3 arnaıy tehnıka jáne 8 maman jumyldyrylǵan, — delingen habarlamada.
Apat saldarynan Shákárim — Prokofev — Qulymbetov — Brýsılovskıı kósheleri aýmaǵyndaǵy tutynýshylarǵa ystyq sý berý ýaqytsha toqtatyldy.
Ystyq sý búgin saǵat 23:00 shamasynda qaıta beriledi dep josparlanyp otyr.
Kompanııa atalǵan aýdanda turatyn almatylyqtar men qala qonaqtarynan ýaqytsha qolaısyzdyqtarǵa túsinistikpen qaraýdy ótindi.
Sonymen qatar turǵyndarǵa kez kelgen tótenshe jaǵdaı (sý aǵýy, bý shyǵýy jáne taǵy basqa) bolǵan kezde óz betinshe áreket jasamaı, myna nómirlerge dereý habarlasýdy eskertti:
• +7 (727) 378-06-65 (táýlik boıy);
• +7 (727) 341-07-77 (08:00–18:00 aralyǵynda);
• 109.
Eske salaıyq, buǵan deıin Almatynyń keı aýdanynda eki kún sýyq sý bolmaıtynyn jazǵanbyz.