Almatynyń bir aýdany kesheden beri jaryqsyz otyr

ALMATY. KAZINFORM — Almatynyń Alataý aýdanynda 13 qarashadan beri jaryqsyz otyrǵan shaǵynaýdandar bar. 

«Alataý jaryq kompanııasy» AQ málimetinshe, 13 qarasha kúni 110 kV № 124A jáne № 101A elektr jelileriniń apatty ajyratylýy tirkelgen. Oqıǵa saldarynan birqatar iri qosalqy stantsııa — PS-162A «Alǵabas», PS-169A «Aqbulaq» jáne PS-123A «ATETs-2» ýaqytsha toqtan ajyratyldy.

Apattyń kesiri Alataý aýdanyndaǵy tutynýshylarǵa tıdi.

Elektr qýaty Aqbulaq, Alǵabas, Aqkent, Saıaly, Terekti, Ǵajaıyp, Kóksaı, Nurkent, Daraboz, Zerdeli, sondaı-aq Raıymbek dańǵyly — Momyshuly — Móńke bı kósheleri arasyndaǵy aýmaqta óship qaldy.

Oqıǵa ornyna jedel túrde apattyq-qalpyna keltirý brıgadalary jiberilip, mamandar apattyń sebebin anyqtaýǵa jáne toq berý júıesin qalpyna keltirýge kirisken.

Alaıda 14 qarasha saǵat 9:30–daǵy jaǵdaı boıynsha birneshe shaǵynaýdan turǵyny redaktsııamyzǵa áli de jaryqsyz, jylýsyz ári ystyq sýsyz otyrǵanyn aıtty.

«Alataý jaryq kompanııasy» 14 qarasha, saǵat 00:12–de PS-169A «Aqbulaq» qosalqy stantsııasy 110 kV № 101A jelisi arqyly qaıta qosylǵanyn habarlady.

— Qazirgi ýaqytta Nurkent, Aqkent, Alǵabas, Terekti, Kóksaı shaǵynaýdandaryn elektr energııasymen qamtý jumystary jalǵasyp jatyr. Aqbulaq shaǵynaýdanynda jartylaı qosyldy. Energııamen jabdyqtaý tolyq qalpyna kelgenshe apattyq-qalpyna keltirý jumystary úzdiksiz júrgiziledi, — dep habarlady kompanııa.

Eske salaıyq, buǵan deıin Almatynyń birneshe aýdanynda ýaqytsha jaryq sónetinin jazǵan edik.