Almatynyń botanıkalyq baǵynda jasandy toǵan jóndelip jatyr: altyn balyqtar kóshirildi

ALMATY. KAZINFORM — Almatynyń bas botanıkalyq baǵyndaǵy jasandy toǵan josparly tehnıkalyq tekserýden ótkizilip, profılaktıkalyq jumystar júrgiziledi.

Almatynyń botanıkalyq baǵynda jasandy toǵan jóndelip jatyr: altyn balyqtar kóshirildi
Foto: Almaty botanıkalyq baǵy

Osyǵan oraı, baq jasandy toǵandy mekendeıtin altyn balyqtar men aqqýlardyń basqa orynǵa kóshiriletinin habarlady. Mekeme málimetinshe, mamandar toǵannyń gıdrooqshaýlaǵysh membranalary men jabyndarynyń jaı-kúıin tekserip, anyqtalǵan aqaýlardy joıady. Jumystar júrgiziletin kezeńde balyqtar Aqqý kólinen baqtyń ońtústik parterlik bóliginde, Ál-Farabı dańǵyly jaǵynda ornalasqan toǵanǵa ýaqytsha kóshirilip, qystap shyǵady.

Almatynyń botanıkalyq baǵynda jasandy toǵan jóndelip jatyr: altyn balyqtar kóshirildi
Foto: Almaty botanıkalyq saıabaǵy

— Balyqtardy kóshirý — arnaıy bilim men tájirıbeni, sondaı-aq erekshe uqyptylyqty talap etetin jaýapty jumys. Sondyqtan bul iske Almaty oblysynda tuqy tuqymdas balyqtardy ósirý jáne kóbeıtýmen on jyldan beri aınalysyp kele jatqan «DWS» JK TOO beıindi uıymy tartyldy, — dep habarlady botanıkalyq baqtan.

Kóshirý barysynda balyqtardyń densaýlyǵy tekserilip, aýrý belgileriniń bar-joǵy anyqtalmaq. Qajet bolǵan jaǵdaıda profılaktıkalyq óńdeý jumystary júrgiziledi.

Almatynyń botanıkalyq baǵynda jasandy toǵan jóndelip jatyr: altyn balyqtar kóshirildi
Foto: Almaty botanıkalyq saıabaǵy

— Qys mezgilinde balyqtardyń zat almasý úderisi baıaýlap, qozǵalysy azaıady. Olar sýyq kezeńdi muz astynda ótkizedi. Qystan aman shyǵýy úshin sýdaǵy otteginiń jetkilikti deńgeıin saqtaý asa mańyzdy. Sondyqtan qystaıtyn toǵanda turaqty aeratsııa qamtamasyz etilip, balyqtardyń tirshilik etý jaǵdaıy únemi baqylaýda bolady, — deıdi baq ókilderi.

Eske salaıyq, buǵan deıin Almatynyń Bas botanıkalyq baǵy qysqy jumys kestesine aýysty.