Almatynyń botanıkalyq baǵynda báısheshekter gúldedi

ALMATY. KAZINFORM – Almatynyń bas botanıkalyq baǵynda galantýs gúli, ıaǵnı báısheshekter gúldedi.

Áleýmettik jelide qar astynan shyqqan názik gúlderdiń beınejazbasy jarııalandy.

Botanıkalyq baqtyń baspasóz qyzmeti báısheshekter gúldeýi – kóktemniń kelýiniń sımvoly ekenin atap ótti.

– Galantýstar gúldedi. Bul názik aq gúlder kóbinese naýryzgúl nemese báısheshek dep atalady. Ár jyl saıyn biz olardyń paıda bolýyn asyǵa kútemiz. Mine, olar ótken jyly qulaǵan japyraqtardyń arasynan abaılap shyǵyp, qys aıaqtalyp kele jatqanyn eske saldy. Osy maýsymda eń alǵashqy gúlderdi biz qańtar aıynda baıqasaq, al jappaı gúldený tek qazir, aqpan ortasynda bastaldy, - delingen baq jazbasynda.

Botanıkalyq baqtyń ákimshiligi galantýstar óte názik bolǵandyqtan, olardy basýǵa, jınaýǵa bolmaıtynyn eske saldy.

Eske salaıyq, Qarataý baýraıynda kóktem lebi sezilip, báısheshek gúldeı bastaǵanyn jazǵanbyz.