Almatydaǵy jańa emhananyń qurylysy aıaqtalýǵa jaqyn
ALMATY. KAZINFORM – Almaty qalasy ákiminiń orynbasary Beıbit Shahanov Bostandyq aýdanynda táýligine 500 adam qabyldaýǵa arnalǵan jańa emhananyń qurylys barysyn tekserdi. Aýdan turǵyndary úshin medıtsınalyq qyzmettiń qoljetimdiligin edáýir arttyrýǵa baǵyttalǵan nysan Levıtan kóshesinde salynyp jatyr.
Atalǵan nysandaǵy tórt blok boıynsha monolıtti temirbeton jáne shatyr jumystary tolyq aıaqtalǵan. Qabattarda tereze qurylymdary ornatylyp, ınjenerlik jeliler tartylǵan, árleý jumystarynyń sońǵy kezeńi júrgizilip jatyr. Sondaı-aq qasbetti qaptaý jáne aýmaqty abattandyrý jumystary qatar qolǵa alyndy.
– Jańa emhananyń qurylysy aıaqtalýǵa jaqyn. Bul qoldanystaǵy medıtsınalyq mekemelerdiń júktemesin azaıtyp, aýdan turǵyndaryna zamanaýı talaptarǵa saı, jaıaý jetýge yńǵaıly medıtsınalyq qyzmet kórsetýge arnalǵan mańyzdy nysan. Biz istelip jatqan jumystyń sapasyna erekshe kóńil bólemiz. Emhana qazirgi standarttarǵa tolyq saı salynýda, patsıentter men medıtsına qyzmetkerlerine barynsha qolaıly jaǵdaı jasaý kózdelgen. Nysandy osy jyldyń sońyna deıin paıdalanýǵa berý qajet, - dedi Beıbit Shahanov.
Jobada patsıentterdiń sanyn bóle otyryp, túrli bólimder men qyzmetterdi qamtıtyn kópfýnktsıonaldy medıtsınalyq mekeme qarastyrylǵan.
Mysaly, birinshi qabatta sáýlelik dıagnostıka bólimi, hırýrgııalyq jáne travmatologııalyq kabınetter, ftızıatrııalyq qyzmet (eresekter men balalarǵa arnalǵan), qabyldaý jáne súzgi kabınetteri, balalardy ambýlatorlyq qabyldaý, áleýmettik dárihana, ashana jáne kútý aımaqtary ornalasady.
Ekinshi qabatta áıelder konsýltatsııasy, jastar densaýlyǵy ortalyǵy, otbasylyq densaýlyq ortalyǵy, keńes berý jáne dıagnostıkalyq bólim, profılaktıka jáne áleýmettik-psıhologııalyq kómek bólimi ornalaspaq.
Úshinshi qabatta endoskopııa bólimi, ambýlatorlyq hırýrgııa ortalyǵy, kúndizgi statsıonar, klınıkalyq-dıagnostıkalyq zerthana, ákimshilik blok, medıtsınalyq ońaltý jáne fızıoterapııa bólimderi qarastyrylǵan. Jertóle qabatta ortalyq zararsyzdandyrý bólimi ornalasady.