Almatynyń Bostandyq aýdanynda ýaqytsha sý berý shekteledi
ALMATY. KAZINFORM — Bostandyq aýdanynda sýmen jabdyqtaý jelilerinde josparly-profılaktıkalyq jumystardyń júrgizilýine baılanysty sý berý ýaqytsha toqtatylady.
«Almaty sý» mekesiniń málimetinshe, 13 tamyz saǵat 21:00–den 14 tamyz saǵat 06:00–ge deıin turǵyn úıler men ákimshilik ǵımarattarda sý berý toqtatylady. Ýaqytsha sý bolmaıtyn aımaq: Ál-Farabı dańǵyly — Nazarbaev dańǵyly — Abaı dańǵyly — Baızaqov kóshesi — Botanıkalyq baq — Erǵojın kóshesi.
— Jumystar qalanyń sýmen jabdyqtaý júıesiniń senimdiligi men turaqtylyǵyn arttyrý maqsatynda qolǵa alynǵan. Sý berý qaıta qalpyna keltirilgennen keıin sý qubyrlarynyń jelilerin shaıýǵa baılanysty sýdyń sapasy ýaqytsha ózgerýi múmkin, — dep eskertti «Almaty sý».
Mekeme mamandary sý berilgennen keıin jeliler tolyq shaıylǵansha turǵyndarǵa kir jýǵysh jáne ydys jýǵysh mashınalardy, sondaı-aq sýmen jabdyqtaý júıesine qosylǵan basqa da qurylǵylardy paıdalanbaýdy usynady.
Eske salaıyq, Almatyda birneshe kúnge Jandosov jáne Tsentralnaıa kósheleri jabyldy.
