Almatynyń Bostandyq aýdanyna jańa ákim taǵaıyndaldy
ALMATY. KAZINFORM – Almaty ákimi Darhan Satybaldynyń ókimimen, Prezıdent Ákimshiliginiń jáne qalalyq máslıhattyń kelisimimen Bostandyq aýdanynyń ákimi bolyp Azamat Qaldybekov taǵaıyndaldy.
Azamat Qaldybekov 1984 jyly 11 qazanda týǵan. Ál-Farabı atyndaǵy Qazaq ulttyq ýnıversıtetin «Halyqaralyq quqyq» mamandyǵy boıynsha támamdaǵan. «Bolashaq» baǵdarlamasy boıynsha Dıýk ýnıversıtetinde (AQSh, Soltústik Karolına) quqyq magıstri dárejesin alǵan. Qazaq ulttyq agrarlyq zertteý ýnıversıtetinde fılosofııa doktory (PhD) ǵylymı dárejesin qorǵaǵan.
Eńbek jolyn 2007 jyly Almaty qalasy Bostandyq aýdanynyń №2 aýdandyq sotynda jetekshi maman qyzmetinen bastaǵan.
Ár jyldary QR Ulttyq banki, «Samuryq-Qazyna» AQ, «Azamattarǵa arnalǵan úkimet» memlekettik korporatsııasy» KEAQ qurylymdarynda jumys istedi.
2018 jyly Almaty qalasy ákimi apparatynyń bas ınspektory bolyp jumys istedi. 2018 jyly shildeden 2019 jyly naýryzǵa deıin Almaty qalasy Jetisý aýdany ákiminiń apparatynyń basshysy boldy.
2019-2020 jyldary Almaty qalasy Jer qatynastary basqarmasy basshysynyń orynbasary jáne Almaty qalasy Jasyl ekonomıka basqarmasy basshysynyń orynbasary laýazymdaryn atqardy.
2019 jyly Birinshi prezıdenttik jastar kadrlyq rezervine endi. 2020-2024 jyldary Almaty qalasy Alataý aýdanynyń ákimi bolyp jumys istedi. 2024 jyldan osy ýaqytqa deıin Almaty qalasy ákiminiń orynbasary qyzmetin atqardy.
Eske salaıyq, buǵan deıin Azamat Qaldybekov Almaty ákiminiń orynbasary qyzmetinen ketkenin jazǵanbyz.
Onyń ornyna búginge deıin QR Prezıdenti Ákimshiligi Іshki saıasat bóliminiń meńgerýshisi bolyp jumys istegen Abzal Núkenov taǵaıyndaldy.