Almatynyń basty kósheleriniń birinde jańa avtobýs jolaǵy paıda bolýy múmkin
ALMATY. KAZINFORM — Almatyda qalanyń 2040 jylǵa deıingi Bas josparyn túzetýge arnalǵan qoǵamdyq talqylaýlar ótip jatyr.
Qoǵamdyq talqylaýlar barysynda Almatydaǵy basty kóshelerdiń biri — Ál-Farabı dańǵylynda baǵdarsham qoıylyp, BRT jelisi salynýy múmkin ekeni aıtyldy. Mundaı ózgeris almatylyqtar arasynda qyzý talqylanyp, kópshilik áleýmettik jelilerde narazylyq bildirdi. Adamdar arasynda «keptelisten kóz ashpaıtyn kóshede baǵdarsham qoıý — jaǵdaıdy tipten qıyndatady» degen syndy pikirler bar.
Búgin, qoǵamdyq talqylaýlardyń ekinshi kúninde «Almatybasjospar» ǵylymı-zertteý ınstıtýtynyń dırektory Ashat Sádýov bul suraqqa jeke toqtalyp, qoǵamdyq kólikke basymdyq bermeı keptelis máselesin sheshý múmkin emestigin túsindirdi.
— Eger biz qalany damytyp, ekologııalyq jaǵdaıdy jaqsartqymyz kelse, qoǵamdyq kólikke otyrýymyz kerek. Qazir kópshilik júrgizýshi kózqarasymen qaraıdy, biraq qalaǵa qoǵamdyq kólikke basymdyq beretin túbegeıli qadam qajet. Sonda ǵana keptelis máselesin azaıta alamyz, — dedi ol.
Onyń aıtýynsha, Ál-Farabı dańǵyly uzaq ýaqyt boıy jyldam ári bos kólik dálizi retinde sanalyp kelgen. Biraq qazir kóshedegi ahýal ózgergen.
— Kópshilik Ál-Farabıde jyldamdyq 80 km/saǵat jáne baǵdarsham joq dep sol baǵytqa umtylady. Basynda bul júıe jumys istedi, biraq keıin suranystyń artýy kepteliske alyp keldi. Búginde bul kóshede únemi keptelis bolady. Máskeý men ondaǵy aınalma avtojoldyń tájirıbesi kórsetkendeı, bos kólik dálizi paıda bolǵan sátte barlyǵy sol baǵytqa aǵylady. Ál-Farabı dańǵyly da búginde osy máseleni bastan keship otyr. Jalǵyz sheshim — qoǵamdyq kólikti damytý. Biz osy ustanymdy ustanamyz, — dedi ınstıtýt dırektory.
Ashat Sádýov Ál-Farabı dańǵylyndaǵy qozǵalysty uıymdastyrý tásilderdi ózgertý qajet ekenin aıtty.
— Jeke pikirim — Ál-Farabıge baǵdarsham ornatý kerek. Qazir bul kósheni «adamdarǵa yńǵaıly etý» jospary ázirlenip jatyr. Kóptegen eldegideı, bolashaqta bul jerde jyldam júretin qoǵamdyq kólik dálizderi paıda bolýy da múmkin, — dedi ol.
Erteń Almatynyń 2040 jylǵa deıingi Bas josparyn túzetý boıynsha qoǵamdyq talqylaýlardyń qorytyndy kúni bolady.
Eske salaıyq, buǵan deıin Almatyda jańa metro jelileriniń jobasy tanystyryldy.