Almatynyń barlyq aýdanynda jańa jyldyq shyrshanyń shamy bir ýaqytta jaǵyldy
ALMATY. KAZINFORM – 18 jeltoqsanda Almatynyń barlyq aýdanynda jańa jyldyq shyrshanyń shamy bir ýaqytta jaǵyldy. Negizgi merekelik is-shara Abaı alańynda, Respýblıka saraıynyń aldynda ótti. Bul jerde bıiktigi 22 metr bolatyn qalanyń bas shyrshasy ornatyldy.
Almaty ákimdiginiń habarlaýynsha, bas shyrshany bezendirýge 7 shaqyrymnan astam jańa jyldyq gırlıandalar, sondaı-aq sándik elementter, úlken jáne kishi shyrsha oıynshyqtary, jańa jyldyq áshekeıler men jaryq keskindemeleri paıdalanyldy.
– Qala turǵyndary men qonaqtaryna zamanaýı mýltımedııalyq tehnologııalardy, aýqymdy jaryq bezendirýdi jáne qazaqstandyq estradanyń tanymal oryndaýshylarynyń ónerin biriktirgen mazmundy merekelik baǵdarlama usynyldy. Qalanyń jańa jyldyq bas shyrshasynyń shamyn jaǵý rásiminiń aldynda Respýblıka saraıynyń qasbetinde eki mınýttyq lazerlik shoý kórsetildi, - dep habarlady qala ákimdigi.
Ǵımarattyń qasbetinde Almatynyń ózindik bolmysyn beıneleıtin aýqymdy jaryq keskindemeleri kórsetildi. Kórneki beınelerde qalanyń tanymal sımvoldary — taýlar, búrkit beınesi, sondaı-aq jańa jyldyq elementter qoldanyldy. Kompozıtsııany jarqyn qar ushqyndary, názik jaryq órnekteri men dınamıkalyq jaryq sáýleleri tolyqtyryp, merekelik ári saltanatty atmosfera qalyptastyrdy.
Baǵdarlamanyń taǵy bir basty bóligi, jaryq shoýyn ásem tolyqtyrǵan sahnalyq feıerverk boldy, ol merekelik kóńil kúıdi odan ári kúsheıtti.
Kórermenderge qazaqstandyq estrada juldyzdary, shoý-balet ártisteri men mánerlep syrǵanaýshylar oryndaǵan «Kel, Jańa jyl!» vokaldy-horeografııalyq kompozıtsııasy usynyldy. Sonymen birge sahnada Qazaqstannyń halyq artısi Roza Rymbaeva, Álı Oqapov, Mádı Rymbaev, «KeshYOU», «Jigitter», «Astra» toptary, sondaı-aq Baljan Bıdash pen Kodi óner kórsetti.
Jańa jyldyq shyrshalardyń shamyn jaǵý saltanatty rásimderi qalanyń barlyq 8 aýdanynda ótti. Merekelik alańdar myna mekenjaılarda ornalasqan:
• Jetisý aýdany – «Gúlder» saıabaǵy (Serikov kósh., 2A);
• Bostandyq aýdany – «Atakent» QYІO;
• Áýezov aýdany – Family Park;
• Medeý aýdany – 28 gvardııashy-panfılovshylar atyndaǵy saıabaq;
• Alataý aýdany – «Almaty Arena» sport kesheni;
• Naýryzbaı aýdany – Shuǵyla shaǵynaýdany, 347 (amfıteatr);
• Túrksib aýdany – №6 Oqýshylar úıi (Seıfýllın kósh., 13/1);
• Almaly aýdany – Abaı atyndaǵy QazUTOB.
Eske salaıyq, buǵan deıin qazaqstandyqtar jańa jylda qaı kúnderi demalatynyn jazǵanbyz.