Almatynyń aıaldama keshenderine biryńǵaı dızaın-kod jasalady

ALMATY. KAZINFORM — Almatydaǵy aıaldama keshenderi bir tártippen jańartylyp jasalady. Bul týraly Almaty qalasy Qalalyq mobıldilik basqarmasy habarlady.

Bıyl shilde aıynda ótken Almaty qalasy Máslıhatynyń kezekten tys XXI sessııasy kezinde Qalalyq mobıldilik basqarmasynyń basshysy Saǵyndyq Telibaev megapolıs aıaldamalaryna ortaq «biryńǵaı aıaldama kesheni» jobasy jasalatynyn aıtqan bolatyn. Osy oraıda, Kazinform tilshisi jaýapty vedomstvoǵa saýal joldap, bul baǵyttaǵy jumys qalaı júrip jatqanyn surady.

— Aıaldamalardyń biryńǵaı dızaın-kody jobasy boıynsha «AlmatyBasJospary» ǴZI mekemesi aınalysyp jatyr, — delingen basqarma jaýabynda.

Degenmen, jobanyń tolyq ázirlenip, naqty jumystardyń qashan bastalatany týraly aqparat berilgen joq.

Jalpy mekeme málimetine sáıkes, qazirgi tańda Almaty qalasynda qoǵamdyq kóliktiń — 2261 aıaldama pýnkteri bar. Aıaldama keshenderimen nemese «avtopavılondarmen» — 1990 birligi jabdyqtalǵan, onyń ishinde:

— 1105-i kommýnaldy menshikte.

— 885-i ınvestorlardyń qarajattaryna ornatylǵan.

Joldyń tarlyǵyna baılanysty ne aıaldama pavılonyn ornatýǵa múmkinshilik bolmaǵandyqtan, «Qoǵamdyq kóliktiń aıaldamasy» jol belgileri ornatylǵan 141 aıaldama bar.

— Bıyl Almaty qalasynda ınvestorlar kúshimen — 6 jańa avtopavılon ornatyldy. Bıýdjet tarapynan bul jumystarǵa qarajat jaratylǵan joq, — dep habarlady basqarmadan.

Eske salaıyq, Almatyda aıaldama keshenderi standarttalatynyn 2022 jyly Almaty ákimi aıtqan bolatyn. 

Buǵan deıin Aqtóbe qalasynda aıaldama pavılonyn ornatý jumysy endi bastalatynyn jazǵan edik.