Almatynyń aýdandary qashan ortalyqtandyrylǵan sýmen qamtylady
ALMATY. KAZINFORM – Almatynyń jańa aýdandaryn ortalyqtandyrylǵan sýmen qamtý jáne jańa sý stantsııalaryn salý jumysy qalaı júrip jatyr? Kazinform tilshisi anyqtap kórdi.
Elimizdiń eń iri megapolısi Úlken jáne Kishi Almaty, Aqsaı, Qarǵaly ózenderi, sondaı-aq Almaty (219 uńǵyma) jáne Talǵar (143 uńǵyma) jerasty sý jınaǵyshtary arqyly sýmen qamtamasyz etiledi. Almatylyqtar táýligine 700 myń m³ sý tutynady, al sý aǵynynyń qýaty — táýligine 1,3 mln m³ (rezerv – táýligine 600 myń m³). Degenmen, qalada áli de ortalyqtandyrylǵan sý júıesine qosylmaǵan aımaqtar bar.
Almaty qalasynyń Energetıka jáne sýmen jabdyqtaý basqarmasy Kazinform saýalyna bergen jaýabynda bul másele bir kúnde sheshilmeıtinin, alaıda qalanyń barlyq turǵyndaryn sapaly aýyz sýmen qamtamasyz etý úshin qarqyndy jumys júrgizilip jatqanyn málimdedi.
Vedomstvo málimetinshe, 2026 jyly 14 ótpeli jobany aıaqtap, taǵy 10 joba boıynsha qurylys-montajdaý jumystaryn bastaý kózdelip otyr. Olar 2028 jylǵa deıin júzege asyrylady. Mysaly, qazirgi ýaqytta «Aqsaı» men «Ermensaı» sý jınaǵysh stantsııalary salynyp jatyr jáne taǵy ekeýi – «Barlyq» pen «Saıran» jobalaný ústinde.
«Aqsaı» sý jınaǵyshy qazir 95%-ǵa daıyn, qýaty 22 myń m³ bolmaq. Bul nysan «Aqjar», «Taýjoly», «Tastybulaq», «Taýsamaly», «Shuǵyla» shaǵyn aýdandaryn, sondaı-aq Almaty oblysynyń Jańaturmys» jáne Qyrǵaýyldy aýyldaryn sýmen qamtamasyz etedi. Jalpy 140 myńnan astam adamdy qamtıdy.
- Nysan qurylysy aıaqtalý kezeńinde. Qysqy ýaqytta tehnologııalyq synaqtar júrgizý jáne tazartý rejımderin baptaý úshin qajetti tasqyn sýlar bolmaıdy. Jobalyq talaptarǵa sáıkes, iske qosý-baptaý jumystaryn aıaqtaý jáne nysandy tehnologııalyq iske qosý 2026 jyldyń mamyr aıynyń sońyna josparlanǵan, — dep habarlady basqarmadan.
«Ermensaı» sý jınaǵyshynyń qurylysy 2026 jyldyń qarashasyna deıin aıaqtalady. Nysan qýaty — 9 myń m³. Atalǵan stantsııa Bostandyq aýdanynyń ońtústik-shyǵys bóligin, sonyń ishinde «Nurly taý», «Ermensaı», «Arhat» jáne basqa da shaǵyn aýdandaryn sýmen qamtýǵa múmkindik beredi. Jalpy 25 myńnan astam adam qamtylmaq.
— Nysannyń eki ýchaskesi boıynsha qurylys-montajdaý jumystary júrgizilip jatyr. Ekinshi ýchaskede jermen baılanysty jumystar oryndalyp, irgetastar ornatyldy, sondaı-aq rezervýarlar men sý daıyndaý stantsııasy ǵımaratyn betonmen quıý jumystary bastalyp ketti. Birinshi ýchaskede bólshekteý jumystary aıaqtalyp, kireberis joldar salyndy jáne negizgi tehnologııalyq ári elektrotehnıkalyq jabdyqtar satyp alyndy, — delingen basqarma jaýabynda.
«Barlyq» sý jınaǵyshy boıynsha jobanyń tehnıkalyq-ekonomıkalyq negizdemesi ázirlengen. Ol memlekettik saraptamadan ótip jatyr. Joba júzege asyrylǵan soń, Naýryzbaı jáne Alataý aýdandarynyń 80 myń turǵynyn sýmen qamtıdy. Al Almaly aýdanynda salynatyn «Saıran» sý jınaǵyshy boıynsha jobany ázirleý jumystary endi bastaldy.
Qalada káriz júıesiniń máselesi de ózekti. Energetıka jáne sýmen jabdyqtaý basqarmasy Naýryzbaı aýdanynyń qosylǵan aýmaqtaryn (shamamen 195 myń turǵyn) sý burý júıesimen qamtamasyz etý úshin tıisti jumystar bastalǵanyn málimdedi. Aýdanda uzyndyǵy 34,9 km jáne quny 36,3 mlrd teńge bolatyn Batys káriz kollektorynyń qurylysy júrip jatyr. Jobany 2026 jyldyń qarashasynda aıaqtaý josparlanǵan. Sondaı-aq 2028 jylǵa deıin 500 myńnan astam adamdy qamtıtyn jáne uzyndyǵy 41 km bolatyn qala syrtyndaǵy №1, 2, 3 qala kollektorlar rekonstrýktsııalanady.
Jalpy 2025 jyly Almatyda 306,4 km káriz jelisi salynyp, 5,5 km jeli jańartyldy. 2026 jyly 275,3 km jańa jeli salý jáne 11,9 km jelini jańǵyrtý josparlanǵan.
- 2027-2028 jyldarǵa arnalǵan josparlar boıynsha jyl saıyn shamamen 135-180 km sý qubyry jáne 81 km káriz jelilerin salý men jańǵyrtý kózdelgen, — dep túsindirdi vedomstvo.
Eske salaıyq, Almatyda sý únemdeý tehnologııasyn engizbegen kólik jýý oryndary sýdan ajyratylyp jatqanyn jazǵanbyz.