Almatynyń aryq júıesinde aqaýy bar 124 ýchaske anyqtaldy
ALMATY. KAZINFORM — Almatyda aryq jelisindegi aqaýy anyqtalǵan ýchaskelerdi qalpyna keltirý jumystary júrip jatyr.
Almatynyń kommýnaldyq ınfraqurylymdy damytý jáne turǵyn úı ınspektsııasy basqarmasynyń málimetinshe, megapolıs aryq jelisiniń jaı-kúıine turaqty túrde monıtorıng júrgiziledi. Bıyl qala aýmaǵynda barlyǵy 124 aqaýy bar ýchaske anyqtalǵan. Onyń 80-inde qazir jóndeý jumystary tolyq aıaqtaldy.
— Qazirgi tańda 28 ýchaskede qurylys-montaj jumystary jalǵasyp jatyr. Al qalǵan 16 ýchaskede qajetti jumystardy júrgizý josparlanǵan, — dep habarlady vedomstvo.
Basqarma málimetinshe, Almatydaǵy aryq jelisiniń jalpy uzyndyǵy 1525 shaqyrym. Onyń 1259,4 shaqyrymy kóshe-jol jelisi boıymen ótse, 265,6 shaqyrymy jasyl aımaqtar men turǵyn úı aýlalaryna tıesili. Aryqtardy tazartý jumystary kún saıyn júrgiziledi.
Eske salaıyq, buǵan deıin Almatyda aptap ystyqtan elektr energııasy jappaı óshkenin jazǵanbyz.
