Almatynyń Arbatynda masań kúıde jasóspirimder jatqan: ata-analar jazalandy

ALMATY. KAZINFORM — Áleýmettik jelide Almatynyń Arbatynda jasóspirimderdiń nashar kúıde jatqan beınejazbasy tarady.

Almaty qalasy polıtsııa departamentiniń málimetinshe, oqıǵa senbi kúni Almaty qalasynyń Medeý aýdanynda bolǵan. Tártip saqshylary masań kúıinde júrgen kámeletke tolmaǵan 5 jasóspirimdi anyqtap, olarǵa der medıtsınalyq kómek kórsetilgen.

— Qoǵamdyq orynda mas kúıinde júrý jáne ata-ana retinde mindetterin oryndamaý derekteri boıynsha jasóspirimder men olardyń zańdy ókilderine qatysty zańnamaǵa sáıkes sharalar qabyldandy. Qazirgi ýaqytta tekseris júrgizilip jatyr. Jasóspirimderdiń qalaı alkogol tutynǵany, kimmen birge bolǵany jáne spırttik ishimdikti qaıdan alǵany anyqtalyp jatyr, — dep habarlady departamentten.

Sonymen qatar beınejazbaǵa baılanysty Almaty qalasynyń balalar ombýdsmeni Dıana Erlan pikir bildirdi.

Onyń aıtýynsha, eki bala alkogoldi ýlaný belgilerimen Balalar qalalyq klınıkalyq aýrýhanasyna jiberilgen.

— Ákimshilik quqyq buzýshylyq týraly kodeksiniń 440-baby, 2-bóligi boıynsha ákimshilik hattamalar toltyryldy. Atalǵan fakt polıtsııa basqarmasynda tirkelgen. Jınalǵan materıaldar jasóspirimderdiń turǵylyqty jeri boıynsha Kámeletke tolmaǵandar isi jónindegi komıssııaǵa joldanatyn bolady. Eki jasóspirim Almaty oblysynyń turǵyndary, — dep jazdy ombýdsmen.

Eske salaıyq, buǵan deıin Almaty polıtseıleri qyzmettik kólikte áıeldi bosandyryp alǵanyn jazǵanbyz.