Almatynyń Almaly aýdanyndaǵy úsh kóshede birjaqty qozǵalys engiziledi
ALMATY. KAZINFORM — Almatynyń Almaly aýdanyndaǵy birneshe kóshede 25 maýsymnan bastap birjaqty qozǵalys engiziledi. Bul týraly qalalyq Jol qozǵalysyn uıymdastyrý jáne jolaýshylar kóligi basqarmasynyń ókilderi habarlady.
Jańa shemaǵa sáıkes:
- Prokofev kóshesinde Abaı dańǵylynan Kishi Abaı kóshesine deıingi aralyqta — soltústik baǵytta;
- Kishi Abaı kóshesinde Prokofev kóshesinen Brýsılovskıı kóshesine deıingi aralyqta — shyǵys baǵytta;
- Túrkebaev kóshesinde Sátbaev kóshesinen Tóle bı kóshesine deıingi aralyqta — soltústik baǵytta birjaqty qozǵalys uıymdastyrylady.
Bul ózgerister kóshede kóliktiń kóptep júrý qabiletin arttyrýǵa, kólik júktemesin azaıtýǵa jáne joldaǵy qaýipti jaǵdaıdyń aldyn alýǵa baǵyttalǵan.
— Sheshim kólik legine júrgizilgen taldaý men aýdan turǵyndarynyń ótinishi negizinde qabyldandy. Mamandardyń aıtýynsha, jańa shema kólik qozǵalysyn rettep, jol qozǵalysy qaýipsizdigin arttyrýǵa múmkindik beredi, — dep habarlady vedomstvo.
Joba pılottyq rejımde júzege asyrylady. Onyń tıimdiligine júrgiziletin monıtorıng qorytyndysy boıynsha jol qozǵalysyn odan ári uıymdastyrýǵa qatysty qosymsha sheshimder qabyldanady.
Eske salaıyq, buǵan deıin Medeý aýdanynda Dostyq dańǵylynyń Gogol kóshesinen Jibek joly dańǵylyna deıingi bóliginde soltústik baǵytta jáne Zenkov kóshesiniń Maqataev kóshesinen Gogol kóshesine deıingi bóliginde ońtústik baǵytta birjaqty qozǵalys engizilgen bolatyn.
Sondaı-aq, Áýezov aýdanyndaǵy Atameken kóshesiniń (Atameken shaǵynaýdany) № 103 úıden № 108 úıge deıingi bóliginde de ońtústik baǵytta birjaqty qozǵalys uıymdastyrylǵan.
