Almatynyń «Alataý» teatrynda jańa maýsym premeramen ashyldy
ALMATY. KAZINFORM - «Alataý» dástúrli óner teatry VIII maýsymnyń shymyldyǵyn túrdi. Jańa maýsym «Alatau FM radiosy» spektakliniń premerasymen ashyldy.
«Alataý» teatrynyń dırektory Maqsat Nuralıev maýsymashar konferentsııa kezinde teatrdyń josparlarymen bólisti.
- Óskeleń urpaqty tárbıelep, jaqsy baǵytta qalyptasýy úshin jaqsy dúnıelerdi osy teatrymyzda qoıyp júrmiz. Byltyr maýsymdy premeramen jaýyp, bıyl premeramen ashyp jatyrmyz. Búgingi «Alatau FM radiosy» qoıylymynan bólek, “Birjan sal” qoıylymyn jaryqqa shyǵarý josparymyzda bar. Kelesi jyly Nurǵısa Tilendıev aǵamyzdyń 100 jyldyǵyna, sondaı-aq Qorqyt ata jaıynda spektakl qoıý oıymyzda bar, - dedi teatr dırektory.
Al «Alatau FM radiosy»mýzykalyq komedııasynyń rejısseri Eslám Nurtazın jańa qoıylymda kórermenderdi ázil-qaljyńy jarasqan búgingi kúnniń keıipkerleri men jandy daýystaǵy erekshe ánder kútetinin atap ótti.
- Kóktemde jańa dúnıe jasaıyq dep aqyldasyp, mýzykalyq komedııaǵa toqtadyq. Efrat Sharıpov, Shyńǵys Maman degen jas avtorlar osy pesany jazdy, Ermek Medenov kompozıtory boldy. Qoıylymǵa teatrdaǵy ánshi-bıshilerimizdiń bárin qosýǵa tyrystyq. Shyny kerek, bul - óte qıyn janr. Jeńil qabyldanady, biraq jasalǵan kezde kóp eńbekti talap etedi, - dedi Eslám Nurtazın.
Eske salaıyq, buǵan deıin Almatyda Áýezov atyndaǵy Qazaq ulttyq drama teatrynyń 99-shy maýsymy ashylǵanyn jazǵanbyz.
Sondaı-aq Almaty qýyrshaq teatry birneshe halyqaralyq festıvalde júldeli bolǵanyn jazǵanbyz.
