Almatynyń Alataý aýdanynda jaryqtyń óshýine sebep bolǵan kompanııaǵa aıyppul salynady

ALMATY. KAZINFORM — 13 qarashada Almatynyń Alataý aýdanyndaǵy birneshe shaǵynaýdanda jaryq óshti. Aýdan ákimi oqıǵanyń sebebi men buǵan kim jaýap beretinin túsindirdi.

Alataý aýdanynyń ákimi Danııar Qyryqbaevtyń aıtýyna qaraǵanda, elektr energııasynyń óshýine iri rıteılerdiń tapsyrysy boıynsha gaz qubyryn júrgizý kezinde merdiger kompanııanyń kabeldi zaqymdaýy sebep bolǵan.

— Іri dúkenniń tapsyrysy boıynsha gaz qubyryn aýdandy eskertpeı, ruqsat qaǵazdarynsyz kóldeneń baǵytta burǵylaý ádisimen júrgizbek bolǵan. Sonyń saldarynan 110 kV kabeli zaqymdaldy. Biz táýlik ishinde bárin qalpyna keltirdik: zaqym ornyn taýyp, jaryqty qostyq. Barlyq qalpyna keltirý shyǵynyn kabeldi zaqymdaǵan kompanııa ózi óteıdi. Sonymen qatar Qala qurylysyn baqylaý basqarmasy tarapynan aıyppul salynady, — dedi Danııar Qyryqbaev Almatynyń Óńirlik kommýnıkatsııalar qyzmetindegi brıfıngte.

Eske salaıyq, 2025 jylǵy 13 qarashada shamamen 18:00–de Alataý aýdanyndaǵy birneshe shaǵynaýdanda jaryq óship qaldy.

Túni boıy apattyq qyzmet kúsheıtilgen rejımde jumys istedi.

Alataý aýdanyndaǵy úılerdiń bárine bir táýlikten asa ýaqyt ótken soń jaryq qaıta berildi.