Almatynyń Alataý aýdanynda ınjenerlik jelilerdi damytý jobasy qolǵa alyndy
ALMATY. KAZINFORM — Alataý aýdanynyń 20 myńnan astam turǵyny alǵash ret sý qubyry men káriz júıesine qosylady.
Qalalyq ákimdiktiń málimetinshe, Alataý aýdanyna qarasty 11 shaǵyn aýdanda ınjenerlik jelilerdi damytý aıasynda bıyl birqatar jobany júzege asyrý josparlanǵan.
Qazir olardyń birazynda qurylys-montaj jumystary bastaldy. Alǵabas shaǵyn aýdanynda sý qubyry men kárizdi tóseýdiń 3 kezeńi bastaldy. Bul 584 turǵyn úıde 4 myńǵa jýyq adamdy qamtamasyz etýge múmkindik beredi. Sonymen qatar ol aıaqtalǵannan keıin Qojabekov pen F.Ońǵarsynova kóshelerine asfalt tóseý kózdelgen.
«Shapaǵat» shaǵyn aýdanynda 2,5 myńǵa jýyq adamdy sýmen jabdyqtaý jáne káriz júıesimen qamtamasyz etý maqsatynda 449 turǵyn úıde jobanyń 2-shi kezegindegi qurylys-montaj jumystary júrgizilip jatyr.
«Rahat-Mádenıet» shaǵyn aýdanynda jumysty aıaqtaý 2025 jylǵa josparlanǵan. Bul 2882 turǵyn úıde 14 myńnan astam adamdy qamtamasyz etýge múmkindik beredi.
