Almatynyń Ál-Farabı dańǵylyndaǵy jańa jolaıryq jobasy keıingi qaldyryldy
ALMATY. KAZINFORM – Almatyda byltyr jańa jolaıryq jobasy tanystyryldy.
Almaty ákimdiginiń málimetinshe, Ál-Farabı dańǵyly men Jaqsylyq Úshkempirov kóshesiniń qıylysynda bir deńgeıli aınalma jolaıryq salý josparlandy. Joba ınjenerlik jelilerdi túbegeıli ózgertýdi jáne jańa jer telimderin satyp alýdy, sondaı-aq qurylys kezeńinde Ál-Farabı dańǵylyndaǵy qozǵalysty jabýdy qajet etpeıtini aıtyldy. 2026 jyldyń basynda joba memlekettik saraptamadan ótýi tıis edi.
Jańa jolaıryq qurylysynyń merzimin naqtylaý úshin redaktsııamyz jol ınfraqurylymyn damytý basqarmasyna júgindi. Vedomstvo jaýabynda jobanyń keıinge qaldyrylǵanyn málimdedi.
– Qazirgi ýaqytta «Almatybasjospar» ǴZI Almaty qalasynyń Bas josparyn túzetý jumystaryn júrgizip jatyr. Bas jospardyń jańa redaktsııasy bekitilgenge deıin magıstraldyq kósheler men dańǵyldardy salý máseleleri boıynsha, sonyń ishinde Ál-Farabı dańǵyly men Úshkempirov kóshesiniń qıylysyndaǵy kólik jol aıryǵynyń qurylysy jóninde sheshim qabyldaý múmkin emes, - dep túsindirdi basqarmadan.
Sonymen qatar vedomstvo jaýabyna sáıkes, Bas jospardy ázirleý jáne bekitý barysynda kóshe-jol jelisin keshendi damytý máseleleri, ınjenerlik jáne áleýmettik ınfraqurylym, sondaı-aq qala turǵyndarynyń usynystary men ótinishteri eskeriledi.
Eske salaıyq, 2025 jyldyń 17 qazanynda konkýrstyq rásimderdiń qorytyndysy boıynsha Almaty qalasynyń 2040 jylǵa deıingi Bas josparyn túzetý úshin qala ákimdigi «Almatybas jospary» ǴZI» JShS-men kelisimshart jasady. Al 2025 jyldyń 24-26 jeltoqsan aralyǵynda engiziletin ózgeristerge baılanysty qoǵamdyq talqylaýlar ótti.
Bıyl naýryz aıynda Almatynyń Bas josparyndaǵy ózgerister qashan bekitiletinin jazdyq.
