Almatynyń ál-Farabı dańǵylyndaǵy qaıǵyly jol apaty boıynsha tergeý aıaqtaldy
ALMATY. KAZINFORM — ál-Farabı dańǵylyndaǵy jantúrshigerlik jol apaty boıynsha tergeý aıaqtaldy.
Bul týraly Almaty polıtsııa departamenti baspasóz qyzmeti rastady.
Vedomstvonyń málimetinshe, atalǵan derek boıynsha qylmystyq is qozǵalyp, kúdikti sot sanktsııasymen qamaýǵa alynǵan.
— Qazirgi ýaqytta sotqa deıingi tergep-tekserý aıaqtaldy. Qylmystyq protseske qatysýshylar is materıaldarymen qylmystyq-protsestik zańnamada belgilengen tártipke sáıkes tanysyp jatyr, — delingen habarlamada.
Polıtsııanyń habarlaýynsha, tanysý rásimderi aıaqtalǵannan keıin qylmystyq is sot qaraýyna joldanady.
Eske salaıyq, 2026 jylǵy 21 naýryzǵa qaraǵan túni Zeekr kóliginiń júrgizýshisi ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy.
Keıinirek Almaty polıtsııasy kóshedegi kólik jarystary týraly málimdeme jasady.
Sondaı-aq Almaty qalasy polıtsııa departamentiniń bastyǵy Aıdyn Qabduldınov jol apatyna kóshe jarysynyń sebep bolǵany jáne oǵan polıtsııanyń joǵary laýazymdy tulǵasynyń qatysy týraly jelide taraǵan aqparattarǵa pikir bildirdi.
