Almatynyń Ál-Farabı dańǵylynda jarys uıymdastyrǵan birneshe júrgizýshi jazalandy
ALMATY. KAZINFORM – Almatyda birneshe júrgizýshi Ál-Farabı dańǵylynda túngi ýaqytta jarysqan.
Almaty qalasynyń polıtsııa departamenti áleýmettik jelilerge júrgizilgen monıtorıng nátıjesinde Ál-Farabı dańǵylynda bir top júrgizýshiniń jol qozǵalysy erejelerin óreskel buzyp, qaýipti manevrler jasaǵan beınejazbany anyqtaǵan.
– Beınejazbada olardyń qarsy baǵyttaǵy jolaqqa shyǵýy, kúrt manevrler jasaýy, apatty jaǵdaı týyndatýy jáne qaýipsizdik talaptaryn elemeýi tirkelgen. Jedel júrgizilgen is-sharalardyń nátıjesinde atalǵan quqyq buzýshylyqtarǵa qatysy bar barlyq júrgizýshi ustaldy, - dep habarlady departamentten.
Almaty qalasy polıtsııa departamenti ákimshilik polıtsııa basqarmasynyń bastyǵy Abdınýr Tasybaevtyń aıtýynsha, quqyq buzýshylarǵa qatysty qaýipti manevr jasaý, qarsy jolaqqa shyǵý, jol-kólik oqıǵasyna ákelýi múmkin jaǵdaı týyndatý, kólik quralyn basqarý kezinde uıaly telefon paıdalaný, sondaı-aq qaýipsizdik beldigin taqpaý faktileri boıynsha ákimshilik jaýapkershilik sharalary qoldanylǵan.
Eske salaıyq, 21 naýryzǵa qaraǵan túni Zeekr kóliginiń júrgizýshisi Ál-Farabı dańǵylynyń boıymen kele jatyp, qarsy qozǵalys jolaǵyna shyǵyp ketip, Mercedes avtokóligimen soqtyǵysqan. Jol apaty saldarynan Mercedes kóliginiń júrgizýshisi men eki jolaýshysy oqıǵa ornynda qaza tapty.
Atalǵan derek boıynsha QR Qylmystyq kodeksiniń 345-baby 4-bóligi boıynsha qylmystyq is qozǵaldy. Bul bap boıynsha 10 jylǵa deıin bas bostandyǵynan aıyrý jazasy qarastyrylǵan.
Іshki ister mınıstri Erjan Sadenov Almatydaǵy jol apatynan keıin birqatar basshy qyzmetinen bosatylǵanyn málimdedi.
Keıin Ál-Farabı dańǵylynda bolǵan jol apaty kináli júrgizýshi tergeý ızolıatoryna qamaldy.
