Almatynyń 28 panfılovshy saıabaǵynda ashyq aspan astyndaǵy mýzeı ashyldy
ALMATY. KAZINFORM — Almatynyń 28 gvardııashy-panfılovshylar saıabaǵynda ashyq aspan astyndaǵy mýzeı ashyldy.
Saltanatty is-sharaǵa Qorǵanys mınıstriniń orynbasary, general-maıor Shaıh-Hasan Jazyqbaev pen Almaty qalasy ákiminiń orynbasary Azamat Qaldybekov, Almaty óńirlik garnızonynyń, Ulttyq ulannyń, UQK Shekara qyzmeti akademııasynyń qolbasshylyǵy, Qarýly Kúshterdiń ardagerleri, kýrsanttar jáne «Jas sarbaz» áskerı-patrıottyq qozǵalysynyń tárbıelenýshileri qatysty.
— Bul qarý-jaraq jáne áskerı tehnıkalar mýzeıi — maıdanda erlikpen qaza bolǵan bozdaqtarǵa, jaraqat alǵandarǵa jáne habar-osharsyz ketkenderge qurmet. Bul jeńis úshin jan aıamaı kúresken, tylda jeńisti jaqyndatqan eńbekshilerge, shahterler men kenshilerge, egin egip, mal ósirgen shopandar men dıqandarǵa, stanoktarǵa táýlik boıy ter tókken jumysshylarǵa degen alǵys pen qurmet, — dedi general-maıor Shaıh-Hasan Jazyqbaev.
Іs-shara barysynda Qorǵanys mınıstriniń orynbasary ashyq aspan astyndaǵy mýzeıdiń ashylýyna jáne Áskerler úıin jańǵyrtýǵa atsalysqan tulǵalar men uıymdardy mınıstrlik atynan marapattady.
— 7 mamyr — Otan qorǵaýshylar kúnimen jáne 9 mamyr — Uly Jeńistiń 80 jyldyǵymen quttyqtaımyn. Bıyl biz Uly Jeńistiń 80 jyldyǵyn atap ótip jatyrmyz. Bul beıbit ómir syılaǵan batyr babalarymyzdyń erligine taǵzym etý kúni, — dedi Almaty qalasy ákiminiń orynbasary Azamat Qaldybekov.
Jalpy 28 panfılovshylar saıabaǵynda Ekinshi dúnıejúzilik soǵys jyldarynda Keńes áskeri qoldanǵan áskerı tehnıka — T-34, T-44, T-55 tankteri, 1931 jylǵy 230 mm gaýbıtsalar jáne «Katıýsha» reaktıvti artıllerııasynyń áıgili BM-13 jaýyngerlik mashınasy qoıylǵan.
Sonymen qatar Jeńistiń 80 jyldyǵyna oraı Áskerler úıinde jóndeý jumystary júrgizilgen. Bul ǵımaratta Ulttyq áskerı-patrıottyq ortalyqtyń fılıaly ornalasqan. Nysan qaıta ashylǵannan keıin onda balalar áskerı-patrıottyq klýbtary jumys isteı bastaıdy. Onda kontserttik jáne ózge de zaldarǵa, jaýyngerlik dańq murajaıyna kúrdeli jóndeý júrgizildi.
Eske salaıyq, buǵan deıin Almatynyń 28 gvardııashy-panfılovshylar saıabaǵynda Dańq memorıaly jańartylatynyn jazǵanbyz.