Almatynyń 28 panfılovshy saıabaǵyndaǵy memorıalǵa gúl shoqtary qoıyldy
ALMATY. KAZINFORM — Premer-Mınıstrdiń orynbasary — Syrtqy ister mınıstri Murat Nurtileý men Reseıdiń Syrtqy ister mınıstri Sergeı Lavrov bastaǵan delegatsııa 28 panfılovshy saıabaǵyndaǵy Ekinshi dúnıejúzilik soǵysynda qaza tapqandar memorıalyna gúl shoqtaryn qoıdy.
Atalǵan is-sharaǵa qatysýshylar maıdan dalasynda qalǵan jaýyngerlerdi bir mınýt únsizdikpen eske alyp, olardyń rýhyna taǵyzym etti.
Resmı derekke súıener bolsaq, soǵys jyldary maıdanǵa 1,3 mln qazaqstandyq shaqyryldy. Qazaqstannyń 100 myńnan astam sarbazy jaýyngerlik ordendermen jáne medaldarmen marapattaldy, 500-den astam adam Keńes Odaǵynyń Batyry atandy.
Qazir Almatyda 21 soǵys ardageri turady.
Buǵan deıin Prezıdent Teleradıokesheni soǵys ardageri Jaqan Seısebaevty 100 jasymen quttyqtaǵan bolatyn.
Aıta keteıik, 11 sáýir kúni Almatyda Táýelsiz Memleketter Dostastyǵy Syrtqy ister mınıstrleri keńesiniń kezekti otyrysy ótedi.