Almatynyń 28 panfılovshy saıabaǵynda buralqy ıtter qaptap júr
ALMATY. KAZINFORM – Almaty qalasyndaǵy basty saıabaqtardyń biri – 28 gvardııashy-panfılovshylar saıabaǵynda buralqy ıtter kóbeıip ketken.

Jýyrda ǵana Jeńistiń 80 jyldyǵy atalyp ótip, Ekinshi dúnıejúzilik soǵys ardagerlerine arnalǵan alleıa ashylǵan bul saıabaqta ıesiz ıtter toptasyp júr.
Saıabaq ishinde erkin júrgen, aǵash túbinde jatqan ıtter agenttik tilshisiniń obektıvine ilikti. Tipti olardyń keıbiri agressııalyq minez kórsetken.

Saıabaqta kún saıyn tańerteń serýendeıtin qala turǵyny Qarlyǵash Rahatovanyń aıtýynsha, buralqy ıtter saıabaqta bir aptaǵa jýyq ýaqyttan beri júr.

– Bul ıtterdiń qaıdan kelgeni belgisiz. Buryn munda joq edi. Osy mereke kúnderinen keıin paıda boldy. Bir-ekeý emes, birnesheýi júr. Keıde adamǵa qaraı júgirip, úrip keledi. Qorqasyń. Sol sebepti olardy aınalyp ótýge tyrysamyn, – deıdi ol.

Osy máselege baılanysty Kazinform agenttigi Almaty qalasynyń ákimdigine saýal joldady. Jaýap kútip otyrmyz.

Buǵan deıin Almaty qalasynyń Kásipkerlik jáne ınvestıtsııalar basqarmasyna qarasty Veterınarlyq qyzmet mamandary Kazinform tilshisine ıesiz janýarlardy ustaý jáne aýlaý jumystary qalaı júrgiziletini týraly aıtyp bergen. Olardyń málimetinshe, bıyl bul maqsatqa 580 mln teńge bólingen.

Sondaı-aq qala ákimi turǵyndarmen kezdesý barysynda Almatyda buralqy ıtter máselesiniń qalaı sheshilip jatqanyn baıandaǵan bolatyn.
Aıta ketý kerek, bıyl aýyr jaǵdaıda qalǵan qaraýsyz janýarlarǵa kómek kórsetý úshin eki mamandandyrylǵan brıgada qurylǵan.
Sonymen qatar, Almatyda úı janýarlaryn tegin zararsyzdandyrý baǵdarlamasy júzege asyrylyp jatyr.