Almatynyń 28 gvardııashy-panfılovshylar saıabaǵynda Dańq memorıaly jańartylady
ALMATY. KAZINFORM - Almatyda 28 gvardııashy-panfılovshylar atyndaǵy saıabaqtaǵy Dańq memorıaly aýmaǵynda qalpyna keltirý jumystary júrgiziledi.
Almaty ákimdiginiń málimetinshe, qalpyna keltirý jumystary arnaıy komıssııanyń tekserisi nátıjesinde bastaldy. Komıssııa 50 jyl bolǵan memorıaldyq keshendi tekserip, ondaǵy granıt jabyndysy, tas taqtalary men kespe tastary aıtarlyqtaı tozǵanyn anyqtaǵan.
- Bul aýmaqta sońǵy 20 jylda jóndeý jumystary júrgizilmegen, sondyqtan memorıaldyń tarıhı kelbetin saqtaı otyryp, ony bastapqy qalpyna keltirý týraly sheshim qabyldandy, - dep habarlady ákimdikten.
Qalpyna keltirý jumystary aıasynda Máńgilik alaý tuǵyrynyń granıtti tastary tazalanyp, jańartylyp, memorıaldyq keshen men Voznesensk sobory arasyndaǵy kespe tas aýystyrylady. Jóndeý jumystaryn 2025 jyldyń sáýir aıynda aıaqtaý josparlanyp otyr.
Aıta keteıik, 28 gvardııashy-panfılovshylar atyndaǵy saıabaǵy Dańq memorıaly – tarıhı-sáýlet jáne memorıaldyq keshen. Ol 1975 jyly 8 mamyr kúni Jeńistiń 30 jyldyǵyna oraı ashyldy.
Eske salaıyq, byltyr Almatydaǵy Máńgilik alaý tabıǵı gazǵa kóshirilgenin jazǵanbyz.