Almatynyń 135 mektebinde sońǵy qońyraý soǵyldy
ALMATY. KAZINFORM – Búgin megapolıstiń 135 mektebinde oqý jylynyń aıaqtalýyna arnalǵan saltanatty jıyndar ótti. Shahardaǵy úlgili oqý oryndarynyń biri – M. Gandı atyndaǵy № 92 mamandandyrylǵan lıtseıde 91 oqýshynyń mektep bitirýine oraı kontserttik baǵdarlama uıymdastyryldy.
«Bizdiń lıtseıde barlyǵy 699 oqýshy bar, sonyń ishinde 91 oqýshy altyn uıasymen qoshtasaıyn dep tur. Olardyń ishinde 12 túlek qyzyl attestatqa, al 1 oqýshymyz altyn belgige úmitker. Bul mamandandyrylǵan lıtseı bolǵandyqtan, balalarymyzdyń bári daryndy. Ótken jyly túlekterimizdiń UBT-da jaqsy nátıje kórsetip, 85%-y grant ıegeri atansa, bıyl da oqýshylarymyz jaqsy nátıjege jetedi degen úmittemin. Jalpy lıtseıimizden 13 oqýshy qazirdiń ózinde sheteldik ýnıversıtetterden grant alyp úlgerdi. Osy jaýapty kezeńde olardyń 11 jyl ishinde alǵan bilimderin paıdalanýy jáne durys tańdaý jasaýy óte mańyzdy. Sondyqtan emtıhandardy sátti tapsyryp, óz armanyndaǵy mamandyqty tabýǵa tilektespin», - dedi M.Gandı atyndaǵy №92 mamandandyrylǵan lıtseıdiń dırektory Quljan Shajabaeva.
Mektep túlekteri muǵalimderge alǵys retinde shyǵarmashylyq qoıylymdar daıyndap, óleń oqydy jáne án shyrqap, dombyrada oınady. Baǵdarlama sońynda 11 synyp oqýshylary qoshtasý valsin oryndady.
«Búgin óte baqytty ári kóńilimiz tolqıtyn kún. Biz mekteppen, muǵalimdermen, dostarmen qoshtasamyz. Qıyn kúnderdegi aqyl-keńesteri men qoldaýy úshin muǵalimderimizge alǵys aıtqym keledi. Bolashaqta dáriger bolý úshin ýnıversıtette medıtsına mamandyǵyna tússem deımin», - dedi 11 synyp túlegi Aıaýlym Serikova.
Aıta keteıik, bıyl Almaty mektepterin 16 myńǵa jýyq túlek bitirdi. Onyń ishinde 433 oqýshy «Altyn belgi» belgisine, 1 392 úzdik attestatqa úmitker. Almatyda 337 jalpy bilim beretin mektep, onyń ishinde 215 memlekettik jáne 122 jekemenshik mektep jumys isteıdi. 2023-2024 oqý jylynda 1-11 synyptarda 300 myńnan astam oqýshy oqydy.
