Almatyny jaryqtandyrý isi boıynsha sot sheshim shyqty

Mamandandyrylǵan aýdanaralyq ekonomıkalyq soty «Almaty qalasynyń syrtqy jaryqtandyrýyn jańǵyrtý» jobasy boıynsha memlekettik-jekemenshik áriptestik (MJÁ) shartyn buzý týraly sheshim shyǵardy, dep habarlaıdy Kazinform.

Osylaısha, «Almaty Qala Jaryq» Memlekettik kommýnaldyq kásiporynynyń «ABM - Vuilding 2007» JShS, «Elektroremont» JShS jáne «ABM – Project» JShS úsh kompanııadan turatyn jeke áriptes-konsortsıýmmen shartty buzý týraly talaby qanaǵattandyryldy.

Ákimdik málimetinshe, shart jasalǵan kezde jeke seriktes jyl saıyn 5 jyl ishinde (2019-2023 jj.) 8915 jaryq núktesin jańartýǵa, ıaǵnı zamanaýı shamdar men baǵanalardy aýystyrýǵa mindettelgen.

«2022 jyldyń sońyna qaraı 35 661 jaryq núktesi qosylýy kerek edi, al 2023 jyldyń sońyna qaraı bul san 44 576 jetýi tıis bolatyn. Yntymaqtastyqtyń negizgi sharttarynyń biri osy. Keıinnen, jeke seriktestiń kesteden artta qalýyna baılanysty modernızatsııalaý boıynsha mindettemeler únemi aýystyrylyp otyrdy. MJÁ shartyna qosymsha kelisimderde kórinis tapty. Merzimderdi aýystyrý barysynda modernızatsııalaýdyń osy jylyna jeke seriktes 22 369 sham, 27 716 baǵana jáne 310 qosymsha sham ornatýǵa mindettendi. Bul shamamen úsh jyldyq norma, ótken jylǵy jumys kólemi boıynsha áli de qaryz bar», - dep atap ótti ákimdikten.

Jalpy, 2019–2023 jyldar aralyǵynda ákimdik ınvestıtsııalar men qyzmet kórsetý shyǵyndaryn óteýge shamamen 27 mlrd teńge tóledi.

«Aıaqtaý merzimin aıtpaǵanda, oryndalǵan jumystardyń sapasy tómen boldy. Konsortsıým ornatylǵan jabdyq boıynsha qujattamany usynbady. Birde-bir jaryq qurylǵysy paıdalanýǵa berilmedi jáne kommýnaldyq menshikke ótpedi. Nátıjesinde, jańartylǵan shamdar áli de jeke áriptestiń menshiginde»,- dep habarlady ákimdikten.

Sot sheshimi zańdy kúshine engennen keıin jeke áripteske berilgen memlekettik múlikti qaıtarý, shyǵyndardy óteý, sondaı-aq konsortsıýmǵa aıyppul sanktsııalaryn salý jóninde sharalar qabyldanatyn bolady.