Almatyny jańajyldyq bezendirýge 800 mln teńge jumsalady
ALMATY. KAZINFORM — Megapolıste «Almatynyń 8 keremeti: otbasylyq mereke — tańǵajaıyp Jańa jyl» atty aýqymdy baǵdarlama ázirlendi.
Almaty ákimdiginen málim etkendeı, qalanyń barlyq 8 aýdanyn qamtıtyn merekelik is-sharalar 20 jeltoqsanada bastalyp, 31 jeltoqsanǵa deıin jalǵasady.
— Bıyl Almaty qalasynyń jańa jyldyq bezendirýine shamamen 800 mıllıon teńge bólindi. Degenmen, ótken jylǵy ınstallıatsııalardy barynsha qalpyna keltirip, paıdalanýdyń arqasynda, ári mádenıet salasyndaǵy mekemelerdiń belsendi qatysýy nátıjesinde mereke ótken jylmen salystyrǵanda áldeqaıda aýqymdy bolmaq,— dep atap ótti qala ákimdiginen.
Qalanyń jańa jyldyq bezendirilýi
Almaty Jańa jyl qarsańynda áýejaıdan bastap ortalyq alańdarǵa deıin erekshe bezendiriledi. Qala aýmaǵynda 300-ge jýyq ertegi keıipkeri men merekelik nysan beınesindegi ınstalıatsııa ornatylady, onyń ishinde qaıta jóndeýden ótken byltyrǵy 120 shaǵyn sáýlet pishini (ShSP) de qoldanylady. Negizgi kóshe boıyndaǵy aǵashtar jaryqdıodty shamdarmen jáne gırlıandalarmen bezendiriledi. Jalpy, 12 kóshe men dańǵyl boıynda 1500 jaryq elementi ornatylady, onyń 350-i ótken jyly qoldanylǵan kronshteınder.
Sonymen qatar, qaladaǵy 21 ǵımarattyń qasbeti arhıtektýralyq jaryqpen kómkerilip, Almatyǵa jańa jyl qarsańynda erekshe kórik beredi. Almatynyń bas sımvoldarynyń biri – «Kóktóbe» telemunarasy jańajyldyq stılde bezendirilip, qala turǵyndary men qonaqtaryn mýltımedııalyq beınekórinispen qýantady.
Jańa jyldyń basty sımvoldary
Alǵash ret qalanyń negizgi alańdaryna qańqaly emes, klassıkalyq eýropalyq stıldegi erekshe dińgekti shyrshalar qoıylady. Almatydaǵy bas shyrshanyń bıiktigi 22 metr bolady, ol dástúr boıynsha Respýblıka saraıynyń aldyndaǵy Abaı atyndaǵy alańda ornatylmaq. Shyrshany bezendirýge jarqyn dekoratsııalar, iri banttar, 6 shaqyrym gırlıanda jáne qaıta óńdelgen ekologııalyq qaýipsiz materıaldardan jasalǵan oıynshyqtar qoldanylady.
Jalpy, bıyl Almaty qalasynda 80-nen astam shyrsha ornatylady. Ár shyrshany bezendirý úshin 4-6 shaqyrym gırlıanda paıdalanylady. Shyrshalar Tuńǵysh Prezıdent saıabaǵynda, Respýblıka alańynda, «Halyq arena» muz aıdynynda, «Almaty arena» kópfýnktsıonaldy kesheninde, N.Sats atyndaǵy memlekettik akademııalyq balalar men jasóspirimder teatrynda, Naýryzbaı aýdany amfıteatrynda, Abaı atyndaǵy qazaq memlekettik akademııalyq opera jáne balet teatrynda, áıgili Almaty tsırkiniń aldynda, saýda ortalyqtarynyń aýmaǵynda, saıabaqtarda, skverlerde jáne qala turǵyndary jıi demalatyn basqa da qalanyń negizgi oryndarynda boı kóteredi.
Mereke baǵdarlamasy
20 jeltoqsanda saǵat 19:00-de Respýblıka saraıy aldynda Almatynyń bas shyrshasy saltanatty túrde jaǵylady. Shara barysynda Turar, Dakelot, Adill, Madı Rymbaev, Dınaıa, Astro toby, Malika Yes, Baljan Bıdash, ALPHA toby sııaqty estrada juldyzdary óner kórsetedi. Aıaz Ata men Aqshaqar da merekeniń basty qonaǵy bolady.
Astana alańynda bıiktigi 22 metrlik shyrsha men ulttyq naqyshta bezendirilgen Aıaz Atanyń kıiz úıi ornatylady. 20 jeltoqsannan bastap munda jármeńke, sheberlik sabaqtary men oıyndar uıymdastyrylady. Al basty jańajyldyq kontsert dástúr boıynsha 31 jeltoqsan kúni QBTÝ aldynda saǵat 21:00-de ótedi.
Ál-Farabı dańǵylynyń boıyndaǵy «Nurly Taý» bıznes-ortalyǵynyń aldynda 20 jeltoqsanda jańa jyldyq jármeńke men fýd-kort aımaǵy ashylady. 26-31 jeltoqsan aralyǵynda munda arnaıy ornatylǵan sahnada laıv-bend toptary óner kórsetedi. Munda bıiktigi 19 metrlik shyrsha, jarqyn ınstallıatsııalar jáne bezendirilgen aǵashtar erekshe merekelik atmosfera qalyptastyrady.
Arbat Londonnyń Karnabı-strıt stılinde bezendiriledi. Jaıaý júrginshiler aımaǵynda jaryq tonnelder, juldyzdar men sharlardan jasalǵan kompozıtsııalar ornatylady. 20-31 jeltoqsan aralyǵynda munda klassıkalyq jáne sándik shaǵyn shyrshalar jármeńkesi ótedi. Sondaı-aq Arbatta belgili oryndaýshylar men jas mýzykanttardyń óner kórsetýi, sýretshiler kórmesi jáne otbasylyq oıyndar josparlanǵan.
Memlekettik qýyrshaq teatry 20-30 jeltoqsan aralyǵynda balalarǵa «Sıqyrly aına» oıyn-saýyq baǵdarlamasy men Gans Hrıstıan Andersenniń «Qar hanshaıymy» ertegisi boıynsha qoıylym usynady.
Almatylyq tsırk 21 jeltoqsannan 2025 jyldyń 21 qańtaryna deıin «Qar hanshaıymy» atty lazerlik shoý men jańa jyldyq qoıylym usynady. Mereke qarsańynda artıster jańa tsırk nómirleri men eksklıýzıvti kostıýmder daıyndady. Sondaı-aq balalar úshin Máskeýdegi Nıkýlın tsırkiniń artısteri men Ispanııadan kelgen saıqymazaq óner kórsetedi.
Qaladaǵy 8 aýdannyń árqaısysynda Aıaz Ata men ertegi keıipkerleriniń sherýi, jármeńkeler, kórmeler, kontsertter men oıyndar uıymdastyrylady.