Almatyny turaqty damý jolyna shyǵarýǵa tyrystym - Erbolat Dosaev almatylyqtarmen qoshtasty
ALMATY. KAZINFORM – Búgin Almaty máslıhatynyń jınalysynda Erbolat Dosaev óz jumysyn qorytyndylap, Almaty turǵyndaryna úndeý jasady.
- Eń aldymen, týǵan qalama elimizdiń eń qıyn kezeńderiniń birinde qyzmet etýge senim men múmkindik bergeni úshin Memleket basshysy Qasym-Jomart Toqaevqa shyn júrekten rızashylyǵymdy bildiremin. Bul men úshin erekshe mártebe jáne úlken jaýapkershilik boldy. Alǵashqy jumys kúnnen bastap osy joǵary senimdi aqtaý úshin barlyq bilimim men tájirıbemdi salyp, Almatyny turaqty damý jolyna shyǵarýǵa tyrystym. Ótken úsh jyldan astam ýaqyt men úshin kúrdeli synaqtar men mańyzdy jetistikterge toly kezeń boldy. Qalanyń damýyna jáne turǵyndardyń ómir súrý sapasyn arttyrýǵa baǵyttalǵan naqty ózgerister ýaqytyna aınaldy, - dedi eks-ákim.
Erbolat Dosaev Memleket basshysynyń tapsyrmasymen Almatynyń bolashaq damýyn aıqyndaıtyn 20-dan astam strategııalyq qujat qabyldanǵanyn atap ótti. Olardyń qatarynda Almaty qalasynyń 2030 jylǵa deıingi damý baǵdarlamasy, Almatynyń 2040 jylǵa deıingi jańa Bas jospary, qalanyń kólik qańqasynyń master-jospary jáne basqa da mańyzdy qujattar bar.
- Keıingi 3 jylda qalanyń búkil ınjenerlik ınfraqurylymyn aýqymdy modernızatsııalaý bastaldy. 540 km sý qubyry jáne káriz júıeleri jańartyldy, 75 km jańa jol salynyp, 650 km jol jóndeldi. Ótken úsh jylda Almaty ekonomıkasy 20%-dan astam ósip, 29 trln teńgeden asty. Al Almaty bıýdjetiniń kirisi 2022 jylmen salystyrǵanda 2,2 ese ósip, 2,5 trln teńgege jetti. Bizdiń basty mindetimiz – almatylyqtardyń ómir sapasyn jaqsartý boldy, - dedi ol.
Sondaı-aq Erbolat Dosaev ózi qalany basqarǵan úsh jyl ishinde qalada 57 oqý orny jáne 12 densaýlyq saqtaý nysany salynǵanyn ne jańartylǵanyn aıtty.
- Búgin osy múmkindikti paıdalana otyryp, qıyn-qystaý sátterde belsendi atsalysyp, qoldaý kórsetkenderińiz úshin barshańyzǵa shyn júrekten alǵys bildiremin. Men ómir súrý sapasy joǵary jáne jaıly qalalyq ortasy bar, eń zamanaýı ári damyǵan megapolıs retinde Almatynyń bolashaǵyna shyn júrekten senemin, - dep qorytyndylady eks-ákim.
Eske salaıyq, búgin Memleket basshysynyń Jarlyǵymen Erbolat Dosaev Almaty qalasynyń ákimi qyzmetinen ketti.
Ol 2022 jyly 31 qańtar kúni Almaty qalasynyń ákimi qyzmetine Baqytjan Saǵyntaevtyń ornyna taǵaıyndalǵan bolatyn.
Almaty qalasynyń jańa ákimi bolyp Darhan Satybaldy taǵaıyndaldy.