Almatyny qalyń qar basty

ALMATY. KAZINFORM – Almatyda tolassyz qar jaýyp jatyr. Kommýnaldyq qyzmet jolǵa reagent seýip, 450-den astam arnaıy tehnıka shyǵardy.

Almaty ákimdiginen málim etkendeı, kóktaıǵaqtyń aldyn alý jáne jol qaýipsizdigin qamtamasyz etý maqsatynda qar jaýar aldynda joldar 180 tekshe metr suıyq reagentpen óńdeldi. Jolǵa qum-tuz qospasyn sebýge 152 arnaıy tehnıka jumyldyryldy, saǵat 17:00-degi jaǵdaı boıynsha 1250 tonna kóktaıǵaqqa qarsy materıal paıdalanyldy.

– Qardyń jınalyp qalýyn tezdetip joıý úshin qaýipti jol ýchaskelerinde, túsý jáne kóterilý aımaqtarynda, jolaıryqtardyń burylys bólikterinde 46 jedel brıgada kúsheıtilgen rejımde jumys istep jatyr. Olar táýlik boıy kezekshilik etedi, - dep habarlady ákimdikten.

Kúndizgi ýaqytta qar tazalaý jumystaryna 455 tehnıka jáne 1060 jol jumysshysy tartyldy. Sondaı-aq, jaıaý júrginshiler joldaryn, qoǵamdyq oryndardy, qoǵamdyq kólik aıaldamalaryn jáne jerústi ótkelderin mehanıkalandyrylǵan tazalaý úshin 95 shaǵyn kólemdi tehnıka qoldanylady.

«Qazgıdromet» málimetinshe, búgin qar keshki 20:00-ge deıin 5-6 mm-ge deıin jetýi múmkin. Qar 31 qańtar kúni taǵy jaýyp, taǵy 3 mm qosymsha jaýyn-shashyn túsýi yqtımal.

30 qańtar kúni aýa temperatýrasy shamamen 0°S bolady. 31 qańtarǵa qaraǵan túni temperatýra -6…-8°S-qa deıin tómendep, kúndiz -2…-4°S aralyǵynda saqtalady.

Almaty qalasynyń Kommýnaldyq ınfraqurylymdy damytý basqarmasy qala turǵyndary men qonaqtaryn jolda muqııat bolýǵa, jol qozǵalysy erejelerin saqtaýǵa jáne jol júrý kezinde aýa raıyn eskerýge shaqyrady.

Osyǵan deıin aýa raıynyń buzylýyna baılanysty Abaı men Shyǵys Qazaqstan oblystarynda joldyń jabylǵany týraly jazǵan edik.