Almatylyqtarǵa turǵyn úı mańynan bir avtoturaq orny tegin beriledi
ALMATY. KAZINFORM — Almatyda avtoturaq keńistigin uıymdastyrý qaǵıdalaryn jańartý kózdelip otyr. Tıisti jobany máslıhat otyrysynda Jol qozǵalysy jáne jolaýshylar kóligin uıymdastyrý basqarmasynyń basshysy Erjan Dıhanbaev tanystyrdy.
Qujatqa sáıkes, kóppáterli turǵyn úılerdiń turǵyndary úıinen 500 metr radıýsta ornalasqan bir kommýnaldyq avtoturaqta bir avtokólikti tegin qoıa alady. Bul rette naqty avtoturaq orny jeke bekitilmeıdi.
Sonymen qatar qujatta avtoturaqtardy jabdyqtaý, olardyń jumys tártibi men tólem jasaý tásilderine qoıylatyn biryńǵaı talaptar belgilengen. Qaǵıdalardyń saqtalýy mobıldi jáne statsıonarlyq foto jáne beınetirkeý keshenderi arqyly baqylanady.
— Júrgizýshilerge qolaıly jaǵdaı jasaý maqsatynda qoldanystaǵy jeńildik merzimderi de saqtalady. Jolaýshylardy otyrǵyzý nemese túsirý úshin trotýar boıyndaǵy avtoturaqtarda alǵashqy 5 mınýt, al alańdyq avtoturaqtardan shyǵýǵa 10 mınýt tegin ýaqyt beriledi, — dedi Erjan Dıhanbaev.
Sondaı-aq ol soǵys ardagerleri, múgedektigi bar adamdar, kópbalaly analar, elektr kólikteriniń ıeleri jáne jedel qyzmetterdiń kólik quraldary avtoturaq aqysyn tóleýden tolyq bosatylatynyn atap ótti.
Eske salaıyq, bıyl maýsym aıynda Ashyq NQA portalynda «Jol júrisi qaǵıdalarymen rettelmegen bóliginde Almaty qalasynda jol qozǵalysyn uıymdastyrý qaǵıdalaryn bekitý týraly» joba usynyldy. Bul joba búgin máslıhatta talqylandy.
