Almatylyqtarǵa tegin beriletin dári-dármekter tizimine qatysty máslıhat ózgerister engizdi
ALMATY. KAZINFORM — 2025 jylǵy 10 jeltoqsanda ótken Almaty máslıhatynyń kezekten tys sessııasynda «Almaty qalasynda tirkelgen Qazaqstan Respýblıkasy azamattarynyń jekelegen sanattaryna ambýlatorııalyq emdeý kezinde tegin medıtsınalyq kómektiń kepildik berilgen kólemin, onyń ishinde dárilik zattardy, arnaıy emdik ónimderdi, medıtsınalyq buıymdardy qosymsha tegin berý týraly» sheshimge ózgerister engizildi.
Atap aıtqanda, almatylyqtarǵa tegin beriletin keıbir preparat alynyp tastaldy. Olar: júrekshelerdiń fıbrıllıatsııasy jáne typyry kezinde qoldanylatyn Rıvaroksaban jáne osteoartroz kezinde beriletin Endoprotez.
Sonymen birge birneshe aýrý boıynsha tegin beriletin dári-dármekter naqtylandy. Atap aıtqanda, júıeli qyzyl jegi kezinde Rıtýksımab, al dılatatsııalyq kardıomıopatııa dıagnozy qoıylǵan naýqastarǵa Valsartan men Sakýbıtrıl kombınatsııasy qarastyrylǵan.
Buǵan qosa, tegin dári-dármek beriletin aýrýlar tizimi tolyqtyryldy. Endi júıeli qyzyl jegi kezinde Anıfrolýmab, qysqa ishek sındromy kezinde Tedýglýtıd, al optıkonevromıelıt (Devık aýrýy) kezinde Rıtýksımab tegin beriledi.
Bul ózgerister 2025 jylǵy 28 jeltoqsannan bastap kúshine enedi.
Eske salaıyq, buǵan deıin memleketten tegin dári alatyn qazaqstandyqtar retseptide jazylǵan dáriniń balamasyn alǵysy kelse, onyń aqysyn memleket ishinara ótep beretinin jazǵanbyz.