Almatylyqtardyń jaryq máselesine qatysty shaǵymy 2,5 ese azaıdy

ALMATY. KAZINFORM — Almatyda syrtqy jaryqtandyrý júıesi jappaı jańǵyrtylyp jatyr. Bıylǵy jeti aıdyń ishinde qalanyń segiz aýdanynda 21 600 jaryq núktesi qalpyna keltirilip, 230 shaqyrym kabel aýystyryldy, sondaı-aq jańadan 1 225 jaryq baǵany ornatyldy.

Turǵyndardyń jaryq máselesine qatysty shaǵymdary byltyrǵymen salystyrǵanda 2,5 ese azaıyp, bıyl nebári 8 445 ótinish túsken.

— Jyl sońyna deıin qala kósheleriniń jaryqtandyrý deńgeıin 100%-ǵa jetkizý josparlanyp otyr, — dep habarlady Óńirlik kommýnıkatsııalar qyzmeti.

Seıfýllın dańǵyly burynǵydan eki ese jaryq boldy. Sátbaev kóshesinen Almaty-1 vokzalyna deıingi aralyqtaǵy baǵandarǵa eki shamnan bekitilgen jańa konsoldar qoıyldy. Uqsas jobalar Abaı jáne Dostyq dańǵyldarynda, Naýryzbaı batyr, Sátbaev, Brýsılovskıı, Ótegen batyr kóshelerinde de júzege asyrylyp jatyr.

Tımırıazev kóshesinde eski shamdar jańa LED-shamdarǵa aýystyrylyp jatyr, al buryn jaryq bolmaǵan trotýarlarǵa torsher baǵandary ornatyldy. Respýblıka Saraıy aldyndaǵy Abaı alańynda da shamamen 1 shaqyrym kabel men 50 sham jańartylyp jatyr.

28 gvardııashy-panfılovshy saıabaǵynda 250 sham ornyna qýaty joǵary LED-shamdar qoıylady. Shyǵys aınalma jolyndaǵy shamdar qýaty kúshtirek úlgige aýystyrylyp, jaryqtandyrý deńgeıi 20-dan 70 lıýksqa kóterildi. Uqsas jumys Rysqulov dańǵylynda da júrgizilip jatyr.

Jalpy alǵanda, qala ákimdigi men «Almaty Qala Jaryq» mekemesiniń kúshimen buryn qarańǵy bolyp kelgen kósheler men tarmaqtarǵa 400 baǵan, 500-den astam konsol jáne myńǵa jýyq jańa sham ornatyldy.

Eske salaıyq, buǵan deıin Almatyda 40 brıgada jaryqty táýlik boıy baqylaıtynyn jazǵanbyz.