Almatylyqtardyń ortasha jalaqysy 15,5 paıyzǵa ósti
ALMATY. KAZINFORM — Almatyda osy jyldyń birinshi jartyjyldyǵynda qalada ortasha eńbekaqy 15,5 paıyzǵa ósip, 468 myń teńge boldy.
Qala ekonomıkasy basqarmasy málim etkendeı, sáýir aıynda ınflıatsııa naýryz aıynda 9,7%-dan 9,1%-ǵa deıin baıaýlady. 2024 jyly jyldyq ınflıatsııa odan ary 7-8%-ǵa deıin baıaýlaıdy dep boljanyp otyr.
«Qalada turaqty jumys oryndaryna basa nazar aýdara otyryp, jańa jumys oryndary qurylyp jatyr. Jyl basynan beri 50 myńnan astam adam jumysqa ornalasty. Sondaı-aq Almatyda joǵary ınvestıtsııalyq belsendilik saqtalyp tur. Osy jyldyń 9 aıynyń qorytyndysy boıynsha negizgi kapıtalǵa 8,1% ósimmen 1,1 trln teńgeden astam ınvestıtsııa tartyldy. Jalpy, 2024 jyly negizgi kapıtalǵa ınvestıtsııalar kólemi 2 trln teńgege deıin, 2025 jyly — 2,35 trln teńgege deıin ulǵaıady», — dep habarlady basqarmadan.
2024 jyldyń birinshi jartyjyldyǵynda Almatyda ortasha jalaqy 468 myń teńge (respýblıka boıynsha — 392,6 myń teńge) boldy. Nomınaldy mánde jalaqy 15,5%-ǵa, naqty mánde 5,7%-ǵa ósti.
«Jyldyq ınflıatsııa tamyzdaǵy 8,6% — dan qyrkúıektegi 8,3% — ǵa deıin baıaýlady. Bul azyq-túlik taýarlary baǵasynyń 7,7% — ǵa deıin jáne azyq-túlik emes taýarlar baǵasynyń 5,6% — ǵa deıin tómendeýine baılanysty. 2024 jyldyń sońyna deıin jyldyq ınflıatsııa 7,5-8% — ǵa deıin, 2025 jyly-6,5 — 7,5% — ǵa deıin tómendeıdi dep kútilýde», — dep habarlady Almatynyń ekonomıka basqarmasy.
Osy jyldyń basynda elimizde 1,8 mln adamnyń jalaqysy óskeni týraly jazǵan edik.
