Almatylyqtardy alańdatqan Esentaıdaǵy sýdyń túsine qatysty mınıstrlik ne deıdi
ALMATY. KAZINFORM – Almatyda Esentaı ózeniniń túsi ózgerip, tot túske aınaldy. Bul ózgeristi 28 tamyz kúni keshke qala turǵyndary baıqap, jelide jaza bastady.
Ekologııa jáne tabıǵı resýrstar mınıstrligi jaǵdaıǵa qatysty túsinik berdi.
Vedomstvonyń málimetinshe, ózgeris sý arnasyn turaqtandyrýshy qurylǵyny tazalaý jumystary júrgizilgennen keıin bolǵan.
– «Qazselqorǵaý» mekemesiniń aqparaty boıynsha, ózen arnasynda sý aǵysyn turaqtandyrý qurylǵysyn tazalaý jumystary júrgizilip, sonyń saldarynan sýǵa tot bólshekter túsip, túsi ózgergen, - delingen habarlamada.
Qazir arnaıy zerthana mamandary ózen sýyn tekserip jatyr.
Eske salaıyq, buǵan deıin Almatyda Esentaı ózeniniń jaǵalaýyn kórkeıtýge 11 mlrd teńge jumsalatynyn jazǵan edik.
Ózenniń boıy ınvestor esebinen abattandyrylady. Ál-Farabı dańǵylynan bastap Rysqulov dańǵylyna deıingi 7,2 shaqyrym bolatyn ózen arnasy retke keltiriledi.
Osyǵan deıin býyrqanyp aqqan Esentaı ózeni almatylyqtardy alańdatyp qoıǵany týraly jazdyq.