Almatylyqtar jóndelip jatqan kópirden ótý úshin qorshaýdy buzdy: ákimdik túsinik berdi

ALMATY. KAZINFORM — Almatyda ál-Farabı dańǵyly boıyndaǵy «Nur-Múbarak» meshitiniń mańyndaǵy jaıaý júrginshiler kópirinde tańǵy ýaqytta turǵyndar qorshaýdy ózderi alyp tastap, joldyń qarsy betine ótpek bolǵan.

Kazinform tilshisi bul jaǵdaıǵa qatysty Almaty ákimdigi baspasóz qyzmetine resmı saýal joldady.

— Bostandyq aýdany ákimi apparatynyń tapsyrysy boıynsha «IZI Company KZ» merdigerlik uıymy ál-Farabı dańǵyly boıyndaǵy bes jerasty jáne bes jerústi jaıaý júrginshiler ótkelinde kúrdeli jóndeý jumystaryn júrgizip jatyr. Jóndeý tamyz aıynda bastalǵan, al tolyq aıaqtalýy jyl sońyna josparlanǵan, — delingen habarlamada.

7 qazan tańynda turǵyndar óz betimen eskertý plakattary men qorshaýlardy alyp tastap, jóndeý júrip jatqan ótkel arqyly ótkeni anyqtalǵan.

— Qazirgi ýaqytta ótkel qaıta qorshaldy, nysanda táýlik boıy kúzet uıymdastyryldy. Merdiger kompanııaǵa eskertý berilip, barlyq nysandarda baqylaýdy kúsheıtý tapsyryldy, — dep habarlady ákimdiktiń baspasóz qyzmeti.

Qala bıligi almatylyqtardan túsinistik tanytýdy jáne qaýipsizdik talaptaryn saqtaýdy eskertti.

— Qurmetti qala turǵyndary men qonaqtary! Óz ómirińiz ben densaýlyǵyńyzdy qaýipke tikpeńizder. Qaýipsizdik sharalaryn saqtaýlaryńyzdy suraımyz, — delingen ákimdiktiń habarlamasynda.

Eske salaıyq, Almatyda jol jóndeý kezinde júk kóligi opyrylǵan jerge túsip ketkenin habarlaǵanbyz.