Almatylyqtar úı janynda kóligin tegin qoıýǵa qalaı ótinish bere alady
ALMATY. KAZINFORM – Almatyda kópqabatty úılerdiń turǵyndary kommýnaldyq aqyly avtoturaqtardy tegin paıdalana alady.
Tıisti normalar Almaty qalasy máslıhatynyń 2026 jyly 30 shildedegi №324 sheshimimen bekitilgen Jol qozǵalysyn uıymdastyrýdyń jańa qaǵıdalarynda belgilendi.
Almaty qalasy Jol qozǵalysyn uıymdastyrý jáne jolaýshylar kóligi basqarmasynyń málimetinshe, turǵyn úı kesheniniń adamdary men ózge úı-jaılardyń menshik ıeleri ǵımarattan 500 metrge deıingi radıýsta ózderi tańdaǵan bir kommýnaldyq aqyly avtoturaqty tegin paıdalaný quqyǵyn rásimdeı alady.
Tegin paıdalaný quqyǵy árbir úı-jaıǵa bir kólik quralyna beriledi. Bul rette naqty avtoturaq orny paıdalanýshyǵa bekitilmeıdi. ıAǵnı, tańdalǵan avtoturaqta bos oryn bolǵan jaǵdaıda ǵana kólikti qoıýǵa bolady.
Sonymen qatar tegin paıdalaný quqyǵy jerasty parkıngterine, qoǵamdyq kólikke aýysyp minýge arnalǵan avtoturaqtarǵa, jabyq úlgidegi jerústi avtoturaqtarǵa jáne mehanıkalandyrylǵan avtoturaqtarǵa júrmeıdi.
Avtoturaqty tegin paıdalaný quqyǵyn qalaı alýǵa bolady
Ol úshin arnaıy ótinish berý qajet. Quqyq qaǵıdalarda kózdelgen talaptar oryndalǵan jaǵdaıda beriledi. Sonyń ishinde ótinish berýshiniń atyna belgilengen tártippen tirkelgen kólik quraly bolýy kerek.
Negizgi talaptar:
• úı-jaı ornalasqan jerden 500 metrge deıingi radıýsta bir avtoturaqty tańdaýǵa bolady;
• bir úı-jaıǵa bir kólik quraly qarastyrylady;
• naqty avtoturaq orny paıdalanýshyǵa bekitilmeıdi.
Ótinishti 2026 jyly 17 tamyzdan bastap «Almaty parkıng» KMK-nyń ınternet-resýrsy (almaty-parking.kz) arqyly nemese azamattardyń barlyq ótinishin qabyldaý jáne óńdeýdiń biryńǵaı platformasy eOtinish arqyly berýge bolady.
- Tegin paıdalaný quqyǵy menshik ıesimen birge turatyn jaqyn týysyna da menshik ıesiniń jazbasha kelisimi negizinde berilýi múmkin. Úı-jaıdy jalǵa alýshylarǵa tegin paıdalaný quqyǵy zańnamada belgilengen tártippen memlekettik tirkeýden ótken jaldaý sharty negizinde, osy sharttyń qoldanylý merzimine beriledi. Eger úı-jaı nemese kólik quraly ortaq úlestik menshikte bolsa, tegin paıdalaný quqyǵyn alý úshin basqa menshik ıeleriniń jazbasha kelisimi qajet, - dep málimdedi basqarmadan.
Avtoturaq kimge tegin bolady
Jańa qaǵıdalarǵa sáıkes, tıisti rastaıtyn qujattary bar azamattardyń jekelegen sanattary kommýnaldyq aqyly avtoturaqtardy paıdalanǵany úshin tólemnen bosatylady. Olardyń qatarynda:
- Uly Otan soǵysynyń ardagerleri, basqa memleketter aýmaǵyndaǵy áskerı is-qımyldarǵa qatysqan ardagerler, jeńildikteri boıynsha Uly Otan soǵysy ardagerlerine teńestirilgen ardagerler, eńbek ardagerleri;
- Birinshi nemese ekinshi toptaǵy múgedektigi bar adamdar, múgedektigi bar balanyń zańdy ókilderi;
- «Altyn alqa», «Kúmis alqa» tósbelgilerimen nagradtalǵan nemese buryn «Batyr ana» ataǵyn alǵan kópbalaly analar, «Ana dańqy» I nemese II dárejeli ordenderimen nagradtalǵan azamattar;
- Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattar;
- Elektromobıl ıeleri.
Eske salaıyq, bıyl Almatyda aqyly avtoturaq oryndary kóbeıedi.
