Almatylyqtar Úlken Almaty kóline aparatyn jol qurylysyna shaǵymdandy
ALMATY. KAZINFORM - Almatylyqtar Úlken Almaty kóline jaıaý júrginshiler jolyn salý kezindegi olqylyqtarǵa narazy.
Jelide Úlken Almaty kóline jaıaý júrginshiler soqpaǵyn salý kezinde baspaldaqtyń ishine qoqys salynǵany týraly vıdeo jarııalandy. Sózderinshe, atalǵan nysannyń qurylysyna jarty mıllıard teńgeden astam qarjy bólingen.
Almatylyqtar quzyretti organdardan merdigerdi tekserýdi talap etti.
Almaty qalasy týrızm basqarmasy búgin mamandar atalǵan ýchaskege baryp, teksergenin málimdedi.
- Tekserý nátıjesinde jumystardyń belgilengen talaptarǵa saı júrgizilip jatqany anyqtaldy. Soqpaqtyń negizin daıyndaý jáne baspaldaq qurylymdaryn ornatý kezinde tehnologııalyq talaptardyń buzylǵany anyqtalǵan joq, - dep málimdedi basqarma.
Týrızm basqarmasy qala turǵyndary men qonaqtaryn tabıǵatqa uqypty qarap, taýly aýmaqtarda tazalyq saqtaýǵa shaqyrdy.
Eske salaıyq, Almatyda abattandyrý kezinde zań buzǵan merdigerge aıyppul salynǵany habarlandy.
